Martin Henze, një prej këshilltarëve pranë CDU-së gjermane, i njohur për kritikat e tij ndaj Kryeministrit Edi Rama, ka reaguar lidhur me dekretin presidencial të Greqisë, e cila i merr Shqipërisë 12 milje në detin Jon.
Përmes një postimi në Twitter, Henze shprehet se kjo është një marrëveshje e organizuar nga Qeveria autokratike dhe antidemokratike e Edi Ramës dhe nuk ka asnjë lidhje me kriteret e pranimit në Bashkimin Europian.
“Marrëveshja u organizua nga qeveria autokratike, antidemokratike e Edi Ramës dhe nuk ka asnjë lidhje me kriteret e pranimit të Shqipërisë në BE.
Është koha të mos i kërkojmë më autorët për dështimin e Shqipërisë te të tjerët. Autori i vetëm është Edi Rama + bashkëpunëtorët e tij”, shkruan Henze.
Gjatë ditëve të fundit Kryeministri Edi Rama është vendosur nën akuzë nga partitë opozitare lidhur me qëndrimin e tij ndaj dekretit, që tashmë ka hyrë në fuqi nga autoritetet greke, që në mënyrë të njëanshme, i japin të drejtë vetes të zgjerojnë kufirin me 12 milje.
Rama i ka cilësuar akuzat si dokrra, ndërsa shprehet se atje ku është e mundur kufiri mund të zgjerohet me 12 milje detare, por në rastin e Shqipërisë, gjithçka do të zgjidhet në Gjykatën Ndërkombëtare.
