Gjykatësi britanik Richard Mansell QC, ka shprehur publikisht shqetësimet e tij në lidhje me faktin se grupe kriminale shqiptare financojnë kompani ligjore private në Londër.
Ai refuzoi një kërkesë të të afërmve të një të riu shqiptar për ndryshimin e avokatit të caktuar dhe në vend të tij kërkuan një tjetër avokat nga një studio ligjore private.
Bëhet fjalë për gjyqin ndaj 19-vjeçarit shqiptar Egzon Kortoci, i cili ndodhet në paraburgim në Doncaster, në pritje të gjykimit pasi akuzohet për prodhimin e kanabisit. Shqiptari u arrestua në muajin korrik.
Mediat britanike raportojnë se Kortoci është mbrojtur duke dhënë si dëshmi se ishte trafikuar nga grupe kriminale për në Britaninë e Madhe, të cilët e detyruan që të merrej me kultivimin e kanabisit.
Në lidhje me këtë rast, gjykatësit Mansell iu tha që familjarët dhe anëtarët e komunitetit shqiptar, ishin organizuar për të paguar përfaqësimin ligjor privat.
Por ai pyeti se si mund të ndodhte që Kortoci dhe të tjerët në një pozicion të ngjashëm, të cilët ishin trafikuar në vend në brenda një kamioni, për të bërë një jetë më të mirë për veten e tyre, të kishin para të paguanin fatura të shtrenjta ligjore?!
“Ka diçka shumë shqetësuese në lidhje me këtë”, theksoi gjykatësi.
Reagimi i tij erdhi pasi u kërkua ndryshimi i avokatit të caktuar me pretendimin se ata kishin para në shtëpi për të financuar mbrojtjen e tyre.
“Ose ata kanë para të bëra vetë ose janë para nga vetë bandat kriminale” tha gjykatësi Mansell.
Ai tha se ky nuk është rasti i vetëm.
“Unë jam duke referuar disa rasteve për të parë se çfarë po ndodh këtu” tha ai.
Pas çështjes, deputeti i Shipley, Philip Davies, kërkoi hetim të aktivitetit të bandave që fusin në Britaninë e Madhe të rinj, të cilët më pas merren me aktivitete të ndaluara.
Kohët e fundit ka pasur një varg aksionesh të policisë në shtëpi në zonën e Bradfordit, ku janë ngritur ferma kanabisi duke arrestuar shumë të rinj.
Në fillim të këtij viti, një hetim i një gazete kombëtare pretendoi se posejduesit e drogës shqiptare trafikonin njerëz të pambrojtur, duke përfshirë fëmijë, në Britani, ku ata janë detyruar të skllavërohen në tregun e drogës.
