Kategoria Superiore/ Partizani-Kukësi dhe Teuta-Tirana premtojnë spektakël, Vllaznia ëndërron shkëputjen

Java e 11-të e Superiores karakterizohet nga duele rivalësh, referuar pozicioneve dhe objektivave. Dallim bënë vetëm çifti Vllaznia-Skënderbeu, një duel skuadrash që janë të diferencuara në skaje.

Për këtë arsye, kjo javë e Superiores, në letër, shikohet si java e shkodranëve, të cilët nëse bëjnë detyrën, kanë shanse që të thellojnë distancën me ndjekësit, por edhe kjo është në varësi të Kukësit.

Verilindorët e trajnerit Skënder Gega do të ndeshen me Partizanin, që i ka surprizuar në fazën e parë. Kukësi do të kërkojë revanshin e humbjes 2-0, si dhe për të mbajtur hapin me Vllaznisë që të mos e lërë të marrë “arratinë”. Edhe Partizani shpreson të mbajë ritmin dhe ta mbyllë sa më mirë 2020-ën, me shpresën se Babagjyshi i Vitit të Ri do t’i sjellë dhuratën e madhe, zhbllokimin e merkatos.

LEXO EDHE  Duel Milan-Juve, mesfushori i Kombëtares shqiptare fut në “sherr” gjigandët italianë

Teuta-Tirana është përballja tjetër mes pretendentësh, ku në duelet e fundit durrsakët kanë dalë triumfues, por akoma nuk e kanë marrë fitoren e parë në shtëpi në kampionat.

Kastrioti-Laçi është sfida e rivalëve të mesit të tabelës, që kërkojnë ngjitjen. Ndërsa Bylis-Apolonia, derbi i prefekturës, kësaj radhe ka vlerën e mbijetesës, ku ballshiotët do të kërkojnë distancimin nga fundi.