Dita e sotme është paraqitur e qetë në spitalet Covid-19, ku kanë munguar ambulancat, por edhe familjarët që presin me orë të tëra për të marrë informacione për të afërmit e tyre që trajtohen lidhur me koronavirusin.
Në tre spitalet Covid, Infektiv, Shefqet Ndroqi, si dhe ish-Kirurgjinë, që funksionon si një spital Covid3, situata ka qenë e qetë, pa flukse shtrimesh të pacientëve të rinj.
Kjo ka krijuar një qëndrueshmëri lidhur me numrin e pacientëve që ndodhen të shtruar në spitale.
Një ditë më parë Ministria e Shëndetësisë raportoi se në spitalet Covid po trajtoheshin 324 pacientë, ndërkohë që numri i shtretërve, sipas të dhënave zyrtare është rreth 500.
Nuk dihet nëse mungesa e pacientëve të rinj ka të bëjë me faktin se pjesa më e madhe e atyre që janë aktivë trajtohen në kushte shtëpie, duke përdorur madje edhe bombulat e oksigjenit, apo ka një stabilizim lidhur me paraqitjen e rasteve të rënda që kërkojnë trajtim spitalor.
Gjithsesi Ministria e Shëndetësisë në raportimet e saj ditore, vijon të deklarojë shifra të larta të numrit të vdekjeve. Një ditë më parë u raportua se 9 pacientë kanë humbur jetën, mes tyre edhe një 38 vjeçar nga Tirana.
