Vetëvendosje ka mbajtur sot mbledhje me qendrat e saj, në të cilën pjesë mori edhe kreu i VV-së, Albin Kurti.
Me anë të një komunikate për media VV ka kërkuar që data e zgjedhjeve të jetë sa më e afërta e mundshmja.
“Në pjesën e parë të mbledhjes, kryetari Kurti foli rreth zhvillimeve të fundit politike, me theks të veçantë krijimin e rrethanave drejt zgjedhjeve të parakohshme parlamentare. Teksa pritet vendimi zyrtar i Gjykatës Kushtetuese, Lëvizja VETËVENDOSJE! kërkon që data e mbajtjes së zgjedhjeve të jetë më e afërta e mundshme”, thuhet në komunikatë.
Tutje, në komunikatë flitet edhe për votat e mërgatës, për të cilat thonë se shteti duhet t’ua lehtësojë mënyrën e votimit.
“Në këtë takim po ashtu u fol edhe për rëndësinë e madhe që ka mërgata jonë. Shteti i Kosovës, përmes institucioneve kompetente, duhet ta bëjë sa më të lehtë mundësinë e votimit nga mërgata, e jo t’ua vështirësojë një gjë të tillë, siç është bërë në të kaluarën”, thuhet në komunikatë.
Gjykata Kushtetuese e ka shpallur të pavlefshme votën e deputetit Etem Arifaj, ku më pas ka paralajmëruar dërgimin e vendit në zgjedhjet qëndrore. Megjithatë, ende nuk ka dalë vendimi zyrtar i kësaj gjykate.
