Policia e Firences bëri të ditur se ka arrestuar Elona Kaleshin, lidhur me vrasjen e Shpëtim dhe Teuta Pashos. Kaleshi raportohet se në kohën që dyshohet se ka kryer krimin ka qene e dashura e djalit të çiftit, Taulantit.
Mediat italiane raportuan se Elona, 36-vjeçare, me precedentë penalë në Itali, thuhet se e ka masakruar çiftin Shpëtim dhe Teuta Pasho në gjumë.
Shkak është bërë një shumë prej 40 mijë eurosh, të cilën Shpëtimi e mbante gjithmonë me vete. Kjo është pista kryesore e hetimit, por nuk është e vetmja.
Sipas gazetës italiane, La Nazione, vajzat e çiftit, të cilat jetojnë po ashtu në Itali, janë të tronditura.
“Dorina dhe Vitoria janë të shokuara,” tha një avokate e tyre, pa specifikuar detaje të tjera.
E para që denoncoi zhdukjen e prindërve ishte Dorina, e cila telefonoi në një program televiziv.
Gazeta La Nazione ka dërguar një gazetar për të marrë një prononcim nga Dorina, por nuk ka mundur. Edhe pse Dorina mendohet se ishte në banesë, ajo u përgjigj shkurt në citofon: nuk ka asnjë Dorinë këtu.
