Erion Dasho, ekspert i shëndetit publik, ka ironizuar mënyrën se si Qeveria dhe institucionet shëndetësore përgjegjëse në vend, po sillen lidhur me procesin e vaksinimit.
Shqipëria nuk ka ende një datë se kur mund të mbërrijnë vaksinat dhe jo më se kur mund të nisë procesi, ndërkohë që ka mungesë informacioni.
Mjeku Dasho ndërsa vlerëson vaksinimin si mjaft të rëndësishëm në përballjen me pandeminë, ironizon strategjitë e Qeverisë, që i konsideron si qesharake.
“Del strategjia e vaksinimit!
Varianti A: blejmë vaksinën, ngrejmë zinxhirin ftohës dhe vaksinojmë shqiptarët. Afati: viti 2025!
Varianti B: dërgojmë 2.8 milionë shqiptarë të vaksinohen në Antarktidë. Afati: viti 2022…”, shkruan Dasho në rrjetet sociale.
Sipas deklarimeve zyrtare, vaksinat në Shqipëri pritet të mbërrijnë në 3 muajt e parë të 2021, por askush nuk e thotë me siguri dhe aq më tepër se çfarë vaksine pritet.
Qeveria dhe Edi Rama dështuan për të siguruar vaksinën Pfizer, e cila ka nisur të shpërndahet, madje edhe të vaksinohen disa miliona njerëz në mbarë Botën.
