Epidemiologu Taulant Muka foli në A2 mbi situatën aktuale në vendin tonë nga koronavirusi, por edhe në botë, si dhe masat që janë të nevojshme të merren.
Ai theksoi se nuk duhet të fokusohemi vetëm te pandemia, duke lënë pas dore sëmundjet e tjera. “Kam thënë se ne nuk duhet të fokusohemi vetëm te rastet Covid, por edhe tek të gjitha sëmundjet e tjera akute apo kronike, nga ana tjetër edhe parametrat ekonomikë. Unë sugjeroj që bizneset të qëndrojnë të hapura dhe të mos merren masa ekstreme. Duhet të fokusohemi te parametrat e përgjithshëm shëndetësorë”.
Sa i përket vaksinës, Muka shprehet se Shqipëria duhet të presë ende dhe në këtë situatë duhet të ndërmarrë masat e duhura.
“Jemi një shtet i varfër, nuk kemi fuqi politike. Kërkesa është e jashtëzakonshme për vaksinën dhe në këtë aspekt, Ballkanit kur t’i vijë radha. Vetëm Anglia, SHBA dhe Kanadaja kanë nisur vaksinimin. Shqipëria duhet të tregohet më e zgjuar, duke mos kopjuar masat që ndërmarrin vendet e tjera”.
Epidemiologu përmendi edhe efektet e mundshme anësore që mund të ketë vaksina ndaj Covid-19.
“Te 60% e personave që testuan vaksinën Pfizer përfituan ethe, po ashtu lodhje dhe dhimbje koke. 45% e të vaksinuarve morën trajtim ndaj dhimbjes. Këto të dhëna tregojnë se nëse nuk e ke të nevojshme vaksinën nuk ke pse e merr atë”, tha ai.
