Kapja e shtetit në Ballkanin Perëndimor dhe Turqi po pasuron politikanët dhe rrjetet e tyre me koston e rëndë të qytetarëve të zakonshëm. Kështu shkruan në raportin e përvitshëm Transparency International (TI) duke nënvizuar problemet kryesore në këto vende.
Sipas Transparency International, kapja e shtetit po shkatërron gjithashtu besimin e publikut në institucionet qeveritare, pasi ato gjithnjë e më shumë po përdoren për t’i shërbyer interesave private.
“Prania e kapjes së shtetit në Shqipëri, Bosnjë dhe Hercegovinë, Kosovë, Mal të Zi, Maqedoni të Veriut, Serbi dhe Turqi është raportuar në raportet e zgjerimit të Komisionit Evropian për vendet, por mbështetjet dhe motivimet e tij nuk janë adresuar sa duhet në reformat e promovuara në rajon”, thuhet më tej.
Sipas raportit, janë bërë përpjekje për të krijuar mekanizma ligjorë dhe transparente dhe institucione të përgjegjshme për të adresuar kontrollin e çështjeve të kombeve nga interesat private.
“Këto kanë synuar të garantojnë pavarësinë gjyqësore dhe parlamentare si dhe zbatimin e barabartë të ligjeve. Sundimi efektiv i ligjit, megjithatë, mbetet një sfidë në këto vende. Vazhdimisht minohet nga liderët politikë, motivimi kryesor i të cilëve është kapja e shtetit për përfitime private. Kjo çon në shpërdorim të gjerë të detyrës publike.
Ky raport i Transparencës Ndërkombëtare ekzaminon dy faktorë kryesorë që mundësojnë kapjen e shtetit në Ballkanin Perëndimor dhe Turqi: mosndëshkimi për korrupsionin e nivelit të lartë dhe ligjet e bëra sipas dëshirës”, shkruhet në raport.
Raporti jep një pasqyrë se si gjyqësori në mënyrë joefektive trajton korrupsionin e madh dhe korrupsionin tjetër nga zyrtarë të nivelit të lartë. Ai gjithashtu tregon se si ky problem dhe ndikimi i panevojshëm në ligj-bërjen në shërbim të interesave private ndihmojnë për të arritur dhe ruajtur kapjen e shtetit.
