Kryeministri Edi Rama iu përgjigj sot akuzave të opozitës, sipas të cilës ai i shërben një grushti prej 10 oligarkësh, që përfitojnë paratë publike edhe në kohë pandemie.
Ndërsa i konsideroi si gënjeshtra akuza të tilla, Rama tha se ata që e thonë një gjë të tillë duhet t´i marrin të keqen.
“Kush i thotë kësaj qeverie që është qeveri pakice e 10 oligarkëve e të pasurve, i merr të keqen, sepse e kundërta është e vërtetë. Është dashur të vijë kjo shumicë para 7 vitesh e 2 muajsh të ulet në tryezë që të bëjë detyrën që të pasurit të paguajnë më shumë, e ata që fitojnë pak, të paguajnë më pak. Kush thotë që në Shqipëri e mori flama biznesin e vogël, nuk dinë çfarë flasin…”, tha Rama.
Në vijim ai u shpreh se buxheti i vitit 2021 është buxheti që ju vjen në ndihmë familjeve në nevojë.
Ministri i Rindërtimit, Arben Ahmetaj, në krah të Edi Ramës, i qëndroi premtimit të 2013 për 300 mijë vende të reja pune, duke thënë se nëse shihet me lupë dhe jo me emocione politike, atëhere shifrat janë aty.
“Ai diskutimi pa shifra që bëhet në çdo terren se ku janë 300 mijë të punësuarit, kur shihet me lupë të shëndetshme, dhe jo politikisht emocionale. numrat janë aty, siç është konsumi dhe bizneset”, tha Ahmetaj.
Sipas Ahmetajt, në qeverisjen e PS numri i bizneseve të vogla u rrit me 3 herë duke u bërë dhe burim punësimi.
