Kreu demokrat Lulzim Basha i ka drejtuar një apel forcave të policisë që të mos ushtrojnë dhunë ndaj protestuesve dhe të mos i binden urdhërave të paligjshëm për ushtrim dhune ndaj shqiptarëve që protestojnë paqësisht.
Basha tha se protesta e ditëve të fundit është e të rinjve shqiptarë.
“Edi Rama ti thërrasë mendjes mirë, zoti t´a ruajë po i dolën në shesh 500 mijë shqiptarë. Por në 25 prill do t´i dalin në shesh 1.5 milionë shqiptarë”, tha Basha, duke iu përgjigjur kështu deklaratave të Kryeministrit se nuk do të shkarkojë Ardi Veliun, edhe sikur në shesh të dalin 500 mijë protestues.
Basha tha se revolta e të rinjve shqiptarë nuk është organizuar nga Partia Demokratike, por shtoi se është e drejtë e çdo shqiptari që të protestojë.
“Edi Rama sa herë është në hall kujton 21 janarin. Po pse anëtarin e grupit të zjarrit, që sot me bandën e tij po terrorizon Matin, e emëroi në fillim drejtor të OSHEE dhe më pas e emëroi Kryetar Bashkie? Në 21 janar, ishte Garda e Republikës, që veproi pasi u shkel perimetri i sigurisë, nuk ishte policia e cila qëlloi mbi 4 qytetarë”, tha Basha.
Sipas tij, kjo ngjarje u hetua dhe gardistët u përballën me drejtësinë duke marrë edhe dënimet e tyre.
