Talenti i Tiranës, Ernest Muçi, ka dalë në një konferencë për shtyp, përpara ndeshjes me Apoloninë, ku përveç sfidës foli edhe për objektivin prej 15 golash.
Nuk i ndjek shumë gazetat apo lajmet e merkatos. Jam i përqendruar te ndeshja e nesërme. Do mundohemi të marrim sa më shumë pikë dhe ta luajmë sa më mirë. Jemi një grup që po arrijmë të bashkohemi. Jam i lumtur këtu, shpresoj të bëj sa më shumë gola dhe të paraqitem sa më mirë.
Pozicioni më komod – Nuk kam një pozicion të preferuar. Numri 10 është pozicioni më i mirë për mua, por nuk ka rëndësi ku luaj. Dua të jem në fushë. Formacionet e trajnerit kanë qenë shumë të mira. Edhe lojtarët e tjerë ndihen mirë, kështu që s’kemi pse ndryshojmë gjë.
Objektivi me 15 gola në sezon – I qëndroj këtij objektivi. Shpresoj që ta realizoj – Kampionati është shumë i gjatë. Shpresoj të bëjmë mirë gjithë si ekip dhe jo vetëm unë si lojtar.
Apolonia – Është ekip që lufton shumë. Fituan në ndeshjen e fundit. Vijnë të motivuar sepse luajnë ndaj Tiranës dhe ne do fokusohemi sa më shumë në këtë ndeshje dhe do jemi shumë të përqendruar.