Të rinjtë e Fushë Krujës i janë bashkuar sot protestave të organizuara në mbarë vendin për vrasjen e Klodian Rashës nga një efektiv policie.
Aktivisti Aulon Kalaja u shpreh se sot të rinjtë në mbarë vendin kërkojnë drejtësi për Klodianin, pasi ajo që ndodhi mëngjesin e së martës mund t’i ndodhte çdo të riu shqiptar.
Kalaja tha se të rinjtë shqiptarë nuk kanë një plan B, por kanë vetëm një plan A, për të qëndruar dhe jetuar në Shqipëri.
Ai u shpreh se nuk mjafton vetëm dorëheqja e Sandër Lleshajt apo shkarkimi i tij nga posti ministror, por duhet që të hetohet i gjithë yinxhiri komandues i Policisë së Shtetit lidhur me vrasjen e kryer.
Disa dhjetra të rinj të Fushë Krujës u mblodhën në sheshin George W. Bush ku ndezën qirinj në kujtim të 25-vjeçarit të vrarë.
“Duhet t’i lemë fjalët mënjanë, ne nuk dorëzohemi, nuk pranojmë represionin e policisë, nuk pranojmë manipulimin”, tha ai.
