Kryeministri Edi Rama është shfaqur kërcënues ndaj qytetarëv lidhur me protestat e organizuara prej dy ditësh, pas vrasjes së Klodian Rashës nga një pjesëtar i repratit Shqiponja.
Në ditën e tretë të protestave, që pritet të nisin në orën 18:00, Rama ka paralajmëruar se kush djeg dhe thyen shkon pas hekurave, ndërsa i ka bërë thirrje prindërve të ruajnë fëmijët.
Me një gjuhë kërcënuese dhe paralajmëruese, Rama nuk ka nguruar që të akuzojë Presidentin dhe opozitën si të përfshirë në protesta.
“Opozita dhe Presidenti janë jo vetëm nxitësit,po edhe orkestruesit e dhunës që poshtëron kujtimin e Klodianit, gjoja për drejtësi por në fakt vetëm për hesapet politike të LulitSaliutIIliritMonikës! Janë të dëshpëruar se s’kanë asnjë shans të rikthehen në pushtet me zgjedhje!
S’kanë më njësi komunale për të mbushur autobuzë, e dinë që përveç turmës së tkurrur të militantëve s’i ndjek më askush dhe paguajnë lart e poshtë deri edhe minorenë, duke u kërkuar të thyejnë e djegin rrugëve të qytetit, që të thonë ja s’ka rend, s’ka siguri, s’ka shtet..
Dhe ndërkohë që polici fajtor del para gjykatës,ministri i brendshëm jep dorëheqjen(edhe pse aspak fajtor, po qytetar fisnik që njeh ndjesën),Saliu krenohet si ka vrarë e si do vriste akoma, Iliri akuzon policinë, Monika shpërndan gurët, Luli ha përshesh e pret të bëhet dhëndër!
Thirrja ime për prindërit e minorenëve të abuzuar nga LSI është ruajini fëmijët nga kthetrat e të paudhëve pa atdhe, ndërsa për këdo tjetër që merr rrugët për të thyer e për të djegur, duhet të jetë shumë e qartë që loja e forcës me ligjin e me shtetin mbaron prapa hekurave!”, shkruan Rama.
Prej dy ditësh në Tiranë dhe qytetet kryesore të vendit organizohen protesta lidhur me vrasjen e 25-vjeçarit. Në ditën e parë protestuesit kërkuan dorëheqjen e Sandër Lleshajt si ministër i Brendshëm, ndërsa dje Kryeministri njoftoi se ai ka paraqitur dorëheqjen e parevokueshme. Gjithashtu protestuesit kërkojnë dorëheqjen e Ardi Veliut, Drejtorit të Përgjithshëm të Policisë së Shtetit, por Rama është treguar i prerë duke e marrë në mbrojtje dhe duke përjashtuar çdo opsion largimi ose pranimi dorëheqjeje.
