Ish-Kryeministri Sali Berisha e konsideroi një vrasje shtetërore dhe akt terrorist, vrasjen e 25-vjeçarit Klodian Rashës nga një efektiv policie.
Berisha e akuzoi Edi Ramën si frymëzuesin e dhunës policore ndaj qytetarëve.
“E mbani mend se çfarë bëri Edi Rama dhe Sandër Lleshaj kur nxorrën policët pa numra? I mbrojtën ata, duke i thënë bëni çfarë të doni. Policia po sillet në mënyrë të padenjë, të dhunshme. Çfarë duhej gazi para protestuesve? Kjo polici i hodhi foshnjeve gazin lotsjellës te ish-stacioni i Trenit, kur iu shenbën shtëpitë”, tha Berisha në Euronews Albania.
Ish-Kryeministri tha se në këto 4 vjet është përdorur gaz lotsjellës ndaj protestuesve shumë më tepër se ç’është përdirur në 30 vjet sëbashku.
Duke bërë një krahasim mes vrasjes së demostruesve më 21 janar 2011 dhe vrasjes së 25-vjeçarit, Berisha tha se nuk ka ndodhur kurrë që policia të vrasë një qytetar të pafajshëm.
“Në 21 Janar veproi Garda e Republikës, duke respektuar ligjin e miratuar nga vetë socialistët, sipas të cilit nëse ti qëllon me gurë gardistin, ai gjuan me armë, sepse nuk ka asgjë tjetër me çfarë të përgjigjet.
Por nuk ka ndodhur kurrë që polici të vrasë qytetarin, ashtu sikundër ndodhi 2 ditë më parë.
Pse u katandis policia kështu? Sepse u vendos Sajmir Tahiri, i lidhur me grupet kriminale dhe kanabizoi vendin. U vendos fatmir Xhafaj, vëllai i një trafikanti droge. Më pas u vu gjeneral Hashashi, Sandër Lleshaj, i cili ishte këshilltar i sigurisë kombëtare të Kryeministrit dhe nuk tha asnjë fjalë për kanabisin”, tha Berisha.
Ai shtoi se Edi Rama sot shprehu urrejtjen më të madhe ndaj shqiptarëve që janë dhunuar, ndërsa theksoi se akuzat e tij ndaj kreut të opozitës, nuk do i thoshte as Spiro Koleka.
Berisha paralajmëroi përkeqësim të situatës në të gjitha aspektet, por shtoi se zgjidhja do të vijë më 25 prill, ku shqiptarët do të përmbysin Edi Ramën.
“Nuk jam si Rama që mendon marrjen e pushtetit me dhunë, përmbysja e Ramës do të ndodhë më 25 prill dhe ai nuk mund t’i shpëtojë revoltës qytetare”, tha Berisha.
