Kryeministri Edi Rama është cilësuar si një autoritarist, i cili nuk ka përballë një opozitë të organizuar. Kritikat janë hedhur nga europarlamentari i të majtës Mick Wallace, gjatë debatit në Komisionin e Jashtëm të Parlamentit Europian, ku u diskutua mboi mundësinë ose jo të hapjes së negociatave mes Shqipërisë dhe BE-së.
Komisioni ka konkluduar se Shqipëria nuk ka plotësuar parakushtet, ndërsa theksi është vënë në rezultatet që duhet të arrijnë institionet e reja të drejtësisë.
Isabel Santos, europarlamentare e majtë, ka përgatitur raportin mbi Shqipërinë, ku theksohet se lufta ndaj krimit të organizuar dhe korrupsionit është në nivele të pakënaqshme. Raporti i Santos përfshin edhe rastin e ekstradimit të turkut Harun Çelik, të cilit iu refuzua e drejta për azil në Shqipëri, ndërsa ai akuzohej nga autoritetet turke si pjesë e lëvizjes Gulen.
Gjithashtu raporti është kritik lidhur me nismat e qeverisë mbi anti-shpifjen, përmes të cilave synohet kontrolli i medias.
“Reformat e shtetit ligjor, gjyqësorit, luftës kundër korrupsionit dhe krimit të organizuar duhet të vazhdojnë. Reforma e drejtësisë duhet përfunduar. Të gjitha forcat politike janë të vetëdijshme për reformën zgjedhore dhe rikthimin e normalizimit të jetës politike në vend.
Një tjetër shqetësim që kam është e ardhmja e vendit. Shumë të rinj largohen nga vendi me shpresën e një jete më të mirë. Ne duhet të krijojmë kushtet për ta që të qëndrojnë në Shqipëri dhe plani i investimit për Ballkanin ofron një mundësi të mirê për këtë”, tha Isabel Santos.
Eurodeputeti Wallace u shpreh se “në Shqipëri, Rama është jopopullor dhe gjithnjë e më shumë autoritarist, nuk ka opozitë të organizuar. Është e nevojshme për të krijuar kushtet që shqiptarët të kthehen në shtëpi dhe ata që janë në shtëpi, të qëndrojnë në shtëpi”.
Eurodeputeti David Lega u shpreh se pavarësisht se po ngrihen institucionet e reja të drejtësisë, duhen rezultate konkrete.
“Pavarësisht progresit, disa nga 15 kushtet për hapjen e konferencës së parë ndërqeveritare nuk janë përmbushur. Më lejoni të jem shumë i qartë. Të mos kujtojnë se do na e hedhin. Ne do të monitorojmë funksionimin dhe zbatimin e reformave që ne kërkojmë. Për shembull, SPAK është shumë premtuese, por ne duhet të shohim gjithashtu rezultate”, u shpreh David Lega.
Eurodeputeti, Mical Simecka ka vënë theksin në funksionimin e Gjykatës Kushtetuese edhe të Lartë, kusht për hapjen e negociatave.
“Është e tmerrshme që kushtet janë ende kaq të varfra për ta sa duhet të lënë vendin për të siguruar jetesën gjetkë,” shtoi ai.
Eurodeputeti Thomas Waitz, nga grupi i të gjelbërve, shprehu kritika lidhur me incineratorët, një çështje e denoncuar për muaj me rradhë nga mediat dhe opozita. Ai tha se Shqipëria ka nevojë për riciklim të mbetjeve dhe jo për djegie apo groposje.Ai kërkoi nga BE të ndihmojë Shqipërinë në programet e riciklimit, duke u shprehur se kushdo që ka shkuar në Shqipëri ka parë hedhjen e mbeturinave gjithandej.
Po kështu europarlamentari tha se Shqipëria do të duhet të rivendosë kushtet ligjore të kufizimit të pronësisë së medias kombëtare, siç është standardi europian.
