Nga Boldnews.al
Sot në familjen e Klodjan Rashës ka zi. 25-vjeçari u vra pranë shtëpisë nga një efektiv policie që i ishte qepur nga pas për t’i vendosur atë gjobën e shkeljes së karantinës. Iku me vrap i riu, por plumbat e policisë sonë janë më të shpejtë dhe nga arma e efektivit u qit arroganca e pushtetit, terrori mbi qytetarët dhe dhuna që vjen nga lart dhe zbatohet në çdo rrugë dhe rrugicë nga njerëz të veshur me uniformë.
Sipas dëshmive të policit që i mori jetën Rashës, e kishte thirrur disa herë të ndalonte pasi kishte shkelur orën policore të karantinës. Nuk i ishte bindur dhe në fund e kishte qëlluar drejtëpërdrejtë në pjesën e sipërme të trupit, me pretendimin se u ndje i rrezikuar dhe iu duk sikur kishte armë në duar. Sado të mundohet të mbulohet, qoftë edhe gradualisht e vërteta do të dalë dhe ai polic, minimalisht i papërgatitur dhe që nuk njeh rregullat e përdorimit të armës, mund të dënohet, por kjo nuk do ketë asnjë lloj vlere, sepse sot një 25-vjeçar pa faj futet nën dhe’.
U desh pak kohë për të shkuar deri në vrasje se përse thyen karantinën…! Në fillim nisën gjobat masive, shoqërimet në polici, dhuna mbi qytetarët që kërkonin minimalisht llogari për arsyet e shoqërimit dhe denigrimi, duke u dërguar në faturën e energjisë atë “gjobë qeveritare”, që më shumë se një masë për të frenuar përhapjen e Covid-19, po përdoret si forma më malinje për të mbajtur nën trysni qytetarët dhe rritur arrogancën e pushtetit.
Janë parë shumë shoqërime të dhunshme nga ana e policisë. Janë fiksuar ato pamje agresiviteti të personave të veshur me uniformën e shtetit që u lëshuan si “skifterët e partisë” mbi qytetarët që protestonin për prishjen e Teatrit Kombëtar. Nuk mund të harrohen as ngjarjet e dy viteve më parë kur me gazin e importuar nga Serbia u “mbushëm” mushkëritë e banorëve gjatë protestave të opozitës. Dhe do vinte edhe kjo kohë kur të shkrehen edhe armët e zjarrit pasi ke përdorur grushtat, shkelmat, shkopinjtë e gomës dhe gazin…
Fati i keq ishte për të riun Klodjan Rasha, i cili mbylli sytë pak metra larg portës së shtëpisë në orën 01.45 të ditës së sotme. Gjithçka e veshur me mjergullnajë nga reagimi zyrtar i policisë, ku për të mbuluar disi turpin ia vendosën prangat “qitësit” të tyre, por me akuzën e lehtë: “Vrasje e kryer në kapërcim të kufijve të mbrojtjes së nevojshme”.
Për ta u kapërcye një kufi, por për një familje sot ka ikur biri i tyre, sepse nuk iu bind urdhrit të policisë për tu ndaluar. Kupola drejtuese e policisë të gjithë përgjegjësinë ia kanë lënë individit që shkrehu armën, efektivit të Patrullave të Përgjitshme të Tiranës. Po ajo krismë arme oshëtin më shumë se “kapërcimi i kufirit të vëtmbrojtjes”. Plumbi të vret, por fryma që vjen nga lart, në formën e agresivitetit të pushtetit është “arma shfarosëse” që të mban nën presion gjithë kohën, që të kërcënon në çdo hap që hedh, që të ngushton lakun me bukën e gonjës dhe në vend të ushqimit të bombardojnë me propagandën qeveritare.
Lojërat perverse mund të vazhdonin më gjatë dhe disa media pranë qeverisë po përdorin taktikën e vjetër për të denigruar 25-vjeçarin që sot nuk jeton më. Mund të kishte edhe më rëndë, që kryepolici i vendit Ardi Veliu të dilte publikisht dhe të merrej me biografinë e familjes, siç bëri në rastin kur justifikoi dhunën çnjerëzore të policisë ndaj një 15-vjeçari që theu karantinën pak muaj më parë.
Tashmë shumë po merren me plumbat e qitur nga polici, pozicionin ku qëlloi, dinamikën e krimit, por pak po e kuptojnë se më shumë se arma e zjarrit në brezin e policit vret fryma e pushtetit, sepse shkaku është tjetërkund, (Aty në godinat pranë Bulevardit ‘Dëshmorët e Kombit’), pasoja në atë rrugicë pranë lagjes Laprakë në Tiranë…
