Mjeku infeksionist, Pëllumb Pipero, tha mbrëmjen e sotme në emisionin “Opinion” se nuk e shqetëson ezaurimi i vendeve në spitale, por fakti se nuk po respektohen masat parandaluese.
Pipero tha se në pavionin e Covid1 ka ende shtretër të lirë, por çështja mbetet te masat parandaluese, që duhen respektuar.
“Ju ftoj të vini dhe të shikoni, ka shtretër, ka staf mjekësor të përkushtuar, por duhet të parandalohen rastet e rënda”, tha ai.
Pipero u shpreh se spitalet rajonale duhet të vihen në funksionim, pasi kjo është më e lehtë qoftë për të sëmurët, qoftë për familjarët e tyre.
“Nuk ka pse të mbingarkohet Tirana, pasi edhe ata familjarët që vijnë këtu rrijnë në lokale, dhe janë kontakte të personave të infektuar dhe kështu shtojmë vatrat e infeksionit”, tha Pipero.
Sipas tij, në Tiranë mund të transportohen vetëm në rastet e rënda, kur duhen trajtime të specializuara.
Pipero tha se rastet e vdekjeve në intubim janë të larta jo vetëm në Shqipëri, por në të gjithë Botën.
“Pacienti hyn në intubim kur mushkëria i ka dalë jashtë funksionit dhe mbetet e vetja rrugë intubimi. Pra rrjedhimisht është një gjendje me risk mjaft të lartë”, tha Pipero.
