Udhëzimet më të fundit nga Qendra Europiane për Parandalimin dhe Kontrollin e Sëmundjeve tregojnë se karantinimi i udhëtarëve nuk është një masë efektive në luftën kundër koronavirusit.
Nga të dhënat rezulton se prevalenca e Covid-19 tek udhëtarët është më e ulët se prevalenca e popullsisë në përgjithësi. Sipas udhëzimeve, mes tyre besohet të jetë më pak se 1%. Gjithashtu provat e disponueshme nuk mbështesin karantinën dhe testimin e udhëtarëve si një masë efektive e shëndetit publik, e cila supozohet të zvogëlojë ndjeshëm transmetimin e përgjithshëm.
Raporti argumentoi se udhëtarët nuk duhet të trajtohen si një popullatë me rrezik të lartë nëse nuk kanë pasur kontakt me një rast të konfirmuar COVID-19 dhe se ata duhet t’u nënshtrohen të njëjtave rregulla si popullsia lokale.
Këshilli i Aeroporteve Ndërkombëtare (ACI) Europë, një shoqatë udhëtimesh e industrisë së aviacionit, e ka mirëpritur raportin dhe u kërkoi vendeve anëtare të heqin menjëherë masat e karantinës dhe kufizimet e tjera të udhëtimit.
Ata thanë në një deklaratë se karantina dhe kufizimet e tjera të udhëtimit COVID-19 kanë çuar në kufizime të pashembullta të lirisë së lëvizjes dhe lirisë për të ofruar shërbime. ACI Europe mbështet testimin e shpejtë.
Udhëzimet për industrinë e aviacionit u lëshuan në të njëjtën ditë kur Komisioni Europian zbuloi strategjinë e tij “Qëndrimi i sigurt nga COVID-19 gjatë dimrit”. Brukseli theksoi se një qasje e koordinuar në të gjithë BE-në është thelbësore për të shmangur një tjetër valë pandemie.
Në lidhje me çështjen e udhëtimit, i cili pritet të rritet në të gjithë rajonin përpara Krishtlindjeve dhe Vitit të Ri, Komisioni tha se kërkesat për karantinë mund të ndodhin kur situata epidemiologjike në rajonin e origjinës është më e keqe se destinacioni.
