Autoritetet britanike i kërkuan rregullatorit të saj të medikamenteve të vlerësonte vaksinën kandidate COVID-19 të Universitetit Oksfordit dhe AstraZeneca për furnizim të përkohshëm, çka shënon një hap përpara për të filluar një shpërndarje të saj përpara fundit të vitit.
AstraZeneca pret që 4 milion doza të jenë në dispozicion në Britani deri në fund të muajit tjetër, dhe Ministri i Shëndetësisë, Matt Hancock synon që ky proces të fillojë përpara Krishtlindjeve.
Agjencia rregullatore e Medikamenteve dhe Produkteve Shëndetësore të Britanisë po vlerëson vaksinën ndërsa të dhënat bazohen mbi sigurinë dhe efikasitetin. Hancock gjithashtu i ka kërkuar agjencisë që të miratojë edhe vaksinën kandidate të Pfizer e BioNTech pasi rezultoi se ishte 95% efektive.
Pak ditë më parë Oksford dhe AstraZeneca publikuan rezultate të përkohshme të efikasitetit të cilat treguan se vaksina mund të ishte 90% efektive kur jepet si gjysmë doza e ndjekur nga një dozë e plotë.
Në të njëjtën kohë janë ngritur edhe pikëpyetje në lidhje me qëndrueshmërinë e këtij rezultati, megjithëse agjencia britanike e medikamenteve miratoi përdorimin e regjimit të gjysmë dozës.
Disa ekspertë janë skeptikë duke u shprehur se vaksina e Oksfordit mund të hasë pengesa për të marrë aprovimin e shpejtë të rregullatorit të SHBA-së dhe BE-së.
Ndryshe nga vaksinat e tjera vaksina e Oksfordit vlerësohet se do të jetë më pak e kushtueshme dhe nuk është e nevojshme të qëndrojë të temperatura shumë të ulëta sikundër kërkojnë dy vaksinat e tjera.
