Nga Boldnews.al
Kolegji i Posaçëm i Apelimit ka konstatuar se ish-drejtuesja e Prokurorisë për Krime të Rënda, Donika Prela, ka fshehur pasurinë.
Shkalla e dytë e Vetingut ka zbardhur së fundmi vendimin e shkarkimit të Prelës, në të cilin lexohet, ndër të tjera, se ajo nuk ka deklaruar një shumë prej 25 mijë dollarësh.
Kjo situatë e vendos ish-drejtuesen e Krimeve të Rënda në një situatë vulnerabël përballë legjislacionit penal.
Prela dhe “loja politike”
Donika Prela u vendos në krye të Krimeve të Rënda në Maj 2018, pas një procedure kontraverse të ndjekur nga ish-Prokurorja e Përgjithshme, Arta Marku.
Prela qëndroi në këtë detyrë deri në Dhjetor 2019, kur u krijua prokuroria speciale, SPAK.
Përgjatë mandatit të dyshimtë në krye të Krimeve të Rënda, Donika Prela u akuzua shpesh nga opozita e djathtë se po mbyllte pa fajtorë të gjithë hetimet, ku ishin të përfshirë zyrtarët e lartë socialistë.
Sipas opozitës, në këmbim të këtij shërbimi, Donika Prela do të siguronte kalimin me sukses të Vetingut dhe vijimin e karrierës në sistemit e drejtësisë.
Dhe, në fakt, akuzat publike të opozitës, nuk duket se ishin të pabaza. Prela u konfirmua në Shkurt 2019 nga Komisioni i Pavarur i Kualifikimit, me një vendim që ngriti hije te forta dyshimi për favorizimin e prokurores.
Gjatë shqyrtimit në shkallën e parë, Vëzhguesi ndërkombëtar i seancës, Teo Jacobs, fillimisht u tregua skepktik ndaj të ardhurave të bashkëshortit të prokurores Prela, të cilat kishin shërbyer për krijimin e pasurive të paluajtshme të familjes.
Por, në përfundim, z. Jacobs ndryshoi mendim dhe e përshëndeti përzemërsisht prokuroren Prela, kur ajo u kualifikua nga Komisioni i Pavarur i Kualifikimit, pavarësisht problematikave të shumta që iu identifikuan në seancën dëgjimore.
Komisioneri Publik nuk ishte dakord me vendimin e konfirmimit në detyrë dhe kërkoi shkarkimin e Donika Prelës nga Kolegji i Posaçëm i Apelimit (KPA).
Shkarkimi
Trupa e Kolegjit të Posaçëm të Apelimit, e kryesuar nga Natasha Mulaj, relator Ardian Hajdari dhe anëtarë Ina Rama, Rezarta Schuetz e Sokol Çomo, vendosi në unanimitet shkarkimin nga detyra të Donika Prelës, pasi arriti në konkluzionin se ajo ka probleme me deklarimin e saktë të pasurisë, përfshirë edhe fshehje.
Në vendimin e zbardhur së fundmi, KPA ka konstatuar të paktën 3 problematika thelbësore në kriterin e pasurisë së ish-prokurores Donika Prela.
Sipas KPA;
– Në lidhje me pasurinë apartament banimi, me sipërfaqe 95,6 m2, ndodhur në rrugën Tiranë, rezultoi se subjekti i rivlerësimit ka mungesë të burimit financiar të ligjshëm për të justifikuar pasurinë;
– Në lidhje me pasurinë likuiditete, në shumën 4.501.427,89 lekë, rezultoi se subjekti i rivlerësimit ka mungesë të burimit financiar të ligjshëm për të justifikuar pasurinë
– Në lidhje me transaksionin e huadhënies në shumën 25.000 euro, Kolegji arriti në konkluzionin se kjo shumë është pasuri e subjektit të rivlerësimit dhe e personit të lidhur me të. Për këtë pasuri, rezultoi se ka mungesë të burimit financiar të ligjshëm për të justifikuar krijimin e saj dhe është kryer fshehje pasurie.
Fshehje pasurie
Ndërkohë që dy konstatimet e para janë të mjaftueshme për shkarkimin e subjekteve nga detyra, pika e tretë, pra identifikimi i “fshehjes së pasurisë”, përbën shkak për nisjen e hetimit penal.
Kodi Penal, në nenin 257/a të tij parashikon si vepër të dënueshme penalisht “fshehjen e pasurisë”.
DENONCO