Policia e Shtetit ka dhënë detaje mbi operacionin e koduar “Kështjella”, në të cilin u sekuestrua një sasi heroine, ndërsa janë arrestuar disa shtetas.
Operacioni u shtri në Elbasan dhe në disa qytete të tjera, ndërsa mësohet se lënda narkotike kishte si destinacion Greqinë.
Nga raportimet mësohet se të arrestuarit janë: Hazis Musai, Xhulio Musai, Danjel Xheliaj, Gëzim Balla dhe Endri Karaj.
Pavarësisht se në raportimet e para u tha se ishte sekuestruar një sasi prej 30 kg heroinë, policia në njoftimin zyrtar tha se janë sekuestruar 4 kilogramë e 215 gramë lëndë narkotike e dyshuar heroinë dhe një sasi kanabis.
Si rezultat i operacionit “Kështjella”, në aksin rrugor Elbasan-Metalurgji, në një furgon që transportonte lëndë drusore, që drejtohej nga shtetasi G. B., 46 vjeç, banues në Elbasan, i cili është arrestuar në flagrancë, Policia gjeti dhe sekuestroi 8 pako me lëndë narkotike të dyshuar heroinë me peshë totale 4 kilogramë e 215 gramë heroinë dhe një sasi kanabisi.
Gjithashtu, në kuadër të operacionit janë arrestuar edhe disa persona të tjerë që dyshohet se kanë lidhje me këtë veprimtari kriminale.
Operacioni vijon në Elbasan dhe në disa qytete të tjera.
