Pak ditë më parë u transmetuan pamje nga spitali Infektiv, ku Kryeministri Edi Rama u përpoq të tregonte se spitalet Covid-19, janë në kapacitet të plotë dhe kanë vende të lira për të trajtuar pacientët. Pamjet ekskluzive në ERTV, sikundër shprehej Rama, erdhën në një kohë kur mediat publikonin faktet nga ambulancat që prisnin në rradhë me pacientë, ndërsa kishte denoncime se për disa orë ato trajtoheshin pa mundur të hynin në spitale.
Në vijim të filmimeve, Rama në rolin e një regjizori apo skenaristi, sot ka publikuar serinë e 2, atë të pamjeve nga laboratori i testimeve të ISHP. Pamja e rradhës vjen në një kohë kur Kryeministrit po i kërkohet të shtojë numrin e testimeve, megjithëse raportohet mbi 2000 të tilla në 24 orë. Rama dhe ministrja e Shëndetësisë janë deklaruar se testimet kanë provuar se nuk venë nën kontroll pandeminë, duke sjellë si shembull Francën, Belgjikën apo Gjermaninë.
Por harron se në Shqipëri, nuk ka një panoramë të qartë mbi pandeminë, sa persona janë të infektuar, dhe në kushtet e asimptomatikëve, situata bëhet edhe më alarmante për përhapjen e infeksionit.
“Në brendësinë e Laboratorit të Testimeve të Institutit të Shëndetit Publik, ku gjithçka është sipas standarteve të Bashkimit të Europian dhe s’ka asnjë krahasim të imagjinueshëm me kushtet e disa viteve më parë, e ku punon me tre turne një ekip fantastik specialistësh të nivelit ndërkombëtar, me një përkushtim të admirueshëm”, shkruan Rama në postimin e tij në rrjet, duke publikuar edhe videon e mëposhtme.
Tashmë duhet pritur se cila është seria e tretë e pamjeve që do të paraqesë Kryeministri, në kuadrin e suksesese që po promovon lidhur me shëndetësinë, ndërsa çdo ditë shifrat e personave që humbasin jetën si pasojë e Covid-19 po rriten.
