Mbrëmja e djeshme ishte e para që nisi fillimin e orës policore në të gjithë vendin, që konstaton në ndalimin e lëvizjes pas orës 22:00 deri në 06:00 të mëngjesit.
Dhimitraq Ziu, nëndrejtori i Policisë së Tiranës i ftuar në Radarin Informativ në “ABC” u shpreh se mbrëmë janë vendosur 20 gjoba për thyerje të urdhrit të ndalimit të lëvizjes.
Ai tha se qytetarët janë ndërgjegjësuar për rrezikun dhe pjesa më e madhe e tyre po zbaton urdhrat me përjashtime të vogla që e kanë pësuar me masat administrative.
Ziu tha se në rrugët e Tiranës mbrëmë por edhe sonte dhe në vijim do të jenë në terren 250 efektivë policie.
Lidhur me zbatimin e karantinës nga personat e infektuar, Ziu i ka drejtuar një apel qytetarëve që të denoncojnë në polici rastet.
“Ne kemi edhe ndihmën e qytetarëve që na njoftojnë, por janë të pakta telefonatat. Të gjithë qytetarët dhe komshinjtë të informojnë se policia do të jetë pranë qytetarëve për t’ia komunikuar urdhrin”, tha ai.
