Besard Kadia u emërua sot si zv. ministër i Financave dhe Ekonomisë në Qeverinë Rama. Vendimi, sipas burimeve qeveritare, ishte marrë 1 javë më parë, por sot është zgjedhur të publikohet.
Kadia, një prej emrave të promovuar nga Lulzim Basha, pjesëmarrës aktiv në “çadrën e lirisë” së 2017, më pas anëtar i Këshillit Kombëtar të PD dhe një prej Sekretarëve të kësaj partie, kishte paralajmëruar pak kohv më parë krijimin e një partie politike.
Pas vendimit që e emëronte si zv.ministër, Kadia i ka uruar suksese Lulzim Bashës dhe PD-së.
Ndërkohë në media është publikuar një dokument, sipas të cilit Kadia ishte shkarkuar 1 vit më parë nga funksionet partiake me firmë të Lulzim Bashës.
Në shkresën e 5 nëntorit 2019, thuhet se Kadia kishte shkelur statusin e partisë, duke u bërë anëtar i një tjetër subjekti politik.
Por në dokument nuk thuhet se kush e ka zëvendësuar Kadian si anëtar të Këshillit Kombëtar.
Gjithsesi, nga dita e sotme, pra 1 vit pasi Lulzim Basha e shkarkoi si anëtar të Këshillit Kombëtar, Kadia ka marrë emërimin nga Rama si zv.ministër i Financave, një pozicion teknik, të cilin më parë e kanë pasur shumë emra të njohur e panjohur dhe që në momente të caktuara ose janë dorëhequr ose janë larguar nga Kryeministri.
