Situata e koronavirusit në Itali vijon të jetë ende shqetësuese. Mjekët bëjnë apel për ndërhyrje më të ashpra pasi spitalet sipas tyre janë mbingarkuar.
Gjithashtu sipas mjekëve pritet që të rritet numri i viktimave deri në 10,000, brenda një muaji, shkruajnë mediat italiane.
Nga ana tjetër qeveria ka paralajmëruar vendosje të kufizimeve në rajonet e konsideruara me rrezik më të lartë si Campania, Liguria, Abruzzo dhe Umbria.
Urdhri italian i mjekëve thekson se spitalet po përballen me mungesë hapësire për pacientët me COVID-19, duke kërkuar në këtë mënyrë edhe shtim të masave për parandalimin e përhapjes së virusit.
Ambulancat kanë qenë në radhë jashtë njësive të emergjencës nga Torino në veri në Napoli në jug.
Njerëzit u trajtuan për Covid-19 në makinat e tyre jashtë spitalit Cotugno në Napoli, gjatë fundjavës.
Ndërkohë një grua 78-vjeçare priti në një ambulancë për 26 orë para se të pranohej në spital.
Ndërsa Italia kalon drejt një milion infeksioneve me koronavirus që nga fillimi i pandemisë, 32,616 raste të reja u regjistruan të dielën, një rritje më shumë se shtatëfish që nga 8 Tetori.
