Kreu i qeverisë Edi Rama dhe kryedemokrati Lulzim Basha kanë shkëmbyer replika në distancë. Basha bën përgjegjës Ramën për situatën e krijuar nga koronavirusi në Shqipëri duke i kërkuar llogari se pse nuk e hap spitalin Covid 4. Nga ana tjetër kreu i qeverisë akuzon Bashën se ka marrë pjesë në përgatitjen e dosjes për Shtëpinë e Verdhë.
“Lulëzim! Mos u fshih pas Covidit dhe lëri akuzat për ata që po luftojnë përditë në vijën e parë kundër virusit, po përgjigju për faktin që ke qenë bashkë me mjekun peruan në bërjen e dosjes për Shtëpinë e Verdhë!E thuaje cfarë mendon për votën e PD-LSI pro raportit të Dick Marty!”, shkruan Rama.
Reagimi i Ramës ka ardhur pasi kreu demokrat, Lulzim Basha, i kërkoi llogari kreut të qeverisë lidhur me situatën e krijuar nga koronavirusi në Shqipëri.
Ai thotë se Rama duhet të lërë shpifjet dhe lojërat politike pas deklaratës së këtij të fundit se Basha ka marrë pjesë ka përgatitur dosjen për Sajesën e Shtëpisë së Verdhë.Kreu i PD pyet Ramën se pse nuk është hapur ende spitali Covid 4 ndërkohë që të sëmurët dergjen në ambulanca sepse nuk ka vend për ta.
“Edi Rama leri shpifjet dhe lojërat politike, përgjigju pse nuk e hap Covid 4? Pse të infektuarit dergjen nëpër ambulanca e nuk ka vend për ta? Pse vazhdon vjedhjen dhe i le të sëmurët të vdesin rrugëve. Pasi shkatërrove ekonominë, tani po ju merr shqiptarëve jetën dhe shëndetin”, shkruan Basha.
Më herët, Kryeministri Rama ka përsëritur pyetjen ndaj presidentit Ilir Meta lidhur me votimin e raportit të Dick Martyt bashkë me ish-kryeministrin Sali Berisha.
Ai i drejtohet kryedemokratit Lulzim Basha ku i kërkon sqarim për një dosje të sajesës së Shtëpisë së Verdhë bashkë me mjekun që sipas Ramës thotë se Basha ka mbledhur dëshmitë bashkë me të.
“Ilir a mund t’ia thuash shqiptarëve pse e votove pro raportin e Dick Marty, bashkë me Saliun kur ne e votuam kundër? Po ti Lulëzim a e sqaron dot çfarë dosje ke përgatitur për sajesën e Shtëpisë së Verdhë bashkë me mjekun peruan që dëshmon se ti ke mbledhur dëshmitë bashkë me të?”, shkruan Rama.
