Urdhri i Farmacistëve të Shqipërisë ka dalë me një reagim të dytë. Këtë herë i është drejtuar ashpër disa mjekëve që sipas tij janë shprehur kundër takimit të urdhrit me kreun e Partisë Demokratike, Lulzim Basha.
Në një reagim në facebook, Urdhri i Farmacistëve shprehet se në takimin me kreun e PD-së, nuk është thënë në asnjë moment se ilaçi Remdesivir që injektohet vetëm në spitale jepet për ambulatorët.
Përkundrazi, Urdhri i Farmacistëtëve shprehet se është fakt se ky ilaç blihet nga familjarët e pacientëve në farmaci në kushtet që duhet të sigurohet falas nga shteti.
Deklarata e plotë
Në lidhje me reagimet e shpërndara nga dy apo tre mjekë, në rolin e opinionistëve të mërzitur nga takimi i sotëm, sqarojmë si më poshtë:
Në asnjë moment gjatë takimit, as nga UFSH dhe as nga Z. Basha, nuk është thënë që bari remdesivir përdoret në kushte ambulatore, të gjithë e dimë që ky bar administrohet në kushte spitalore dhe duhet të sigurohet falas nga shteti. Në takim është thënë që për shkak se ky bar mungon në spital, pacientët janë të detyruar ta blejnë atë jashtë spitalit (dhe ky është fakt) ashtu sikurse edhe disa antiviralë të tjerë të paregjistruar, të importuar ilegalisht, që po përshkruhen masivisht edhe nga të mërziturit e takimit të sotëm.
Sa për opinionin e një të ashtuquajturi ish ministër (që për hir të së vërtetës nuk ia vlen as ta marrësh në konsideratë) që na dikton detyrat dhe kompetencat profesionale, duke thënë se farmacistët duhet vetëm të shesin “ilaçe” dhe se nuk mund dhe nuk duhet te mjekojnë por thjesht të freskojnë njohuritë e farmakovigjilencës dhe farmakodinamikës në ekzekutimin e recetave, ndiejmë thjeshtë keqardhje për paturpësinë dhe injorancën me të cilën fyen një komunitet të tërë profesionistësh që janë duke shërbyer me profesionalizëm, humanizëm, devotshmëri dhe sakrificë edhe pse në kushte tejet të vështira, pa asnjë mbështetje dhe ndihmë nga askush.
Ignoratia non est argumentum!
Stop denigrimit të profesionit të nderuar të farmacistit!
