Nga Erion Dasho
Në një dalje të djeshme, kryeministri deklaroi sërish se ai bën gjithçka që i këshillojnë ekspertët pasi “të gjithë parashikimet e tyre kanë dalë”. Këto deklarata ja vlen të analizohen me seriozitet.
Ta nisim nga shifrat:
1. Në prill u parashikuan 18.000 të vdekur ndërkohë që deri tani numri i tyre zyrtarisht jepet 532 dhe, duke korrigjuar për efektin mashtrim, nuk vlerësoj se ka kaluar 1,500 në total. Në se epidemia rivendoset në kontroll, nuk ka as edhe gjasat më të vogla që parashikimi i zymtë të përmbushet.
2. Në korrik u parashikua se piku i famshëm do të vinte në gusht, ndërkohë që në gusht nisi rritja e pandalshme e numrit të rasteve, e cila ende vazhdon.
Kuptohet se secili prej “parashikimeve” ka patur një prapavijë të qartë politike.
Parashikimi apokaliptik për vdekjet synonte të justifikonte politikën e terrorit gjatë karantinës, kurse parashikimi mbi pikun në korrik u bë nga Skënderbeu jr. kur duhej mbrojtur padroni nga akuzat për dështim të përgjigjes ndaj COVID dhe nga fakti se Shqipëria në atë kohë qëndronte midis 4-5 vendeve të para në Europë bazuar në numrin e vdekjeve për banorë.
Aftësia prej Nostradami që kryeministri i vesh Komitetit do të kishte kuptim në se ekspertët do të kishin parashikuar se:
… në nëntor shqiptarët do të preferonin të trajtoheshin në shtëpi pasi u frikësohen spitaleve të rilindur.
… në nëntor fatura e trajtimit të COVID në shtëpi do të shkonte nga disa qindra deri në disa mijëra euro.
… në nëntor çdo shqiptar me pesë lekë mënjanë do të nxitonte të trajtohej në Turqi ku shërimi kushton disa dhjetëra mijëra euro.
Por fatkeqësisht, më tepër se një grup Nostradamësh, kryeministri po përpiqet t’i përdorë kolegët tanë si një grup Nastradinësh që t’i shërbejë si rrufepritës për lajthitjet dhe dështimet e qeverisjes së tij aventureske që u materializua dhe kulmoi kaq dhimshëm dhe frikshëm në përballjen me COVID-in!
Të gjithë jemi të bindur dhe presim se sikundër bënë në qershor kur u distancuan hapur nga vendim-marrja kaotike, edhe sot kolegët tanë do të gjejnë guximin dhe forcën te kundërshtojnë përsëri këtë rol të imponuar që dhunon haptas dinjitetin dhe integritetin e tyre!
Ne qëndrojmë në krah të kolegëve!
