Nga Boldnews.al
Ilir Dashi, ish-drejtuesi i Përgjithshëm i Hekurudhave Shqiptare, është marrë nën hetim nga Prokuroria e Durrësit për “shpërdorim detyre”, nën dyshimet se i ka shkaktuar shtetit një dëm ekonomik në vlerë rreth 10 milionë lekë të reja.
Gjykata e Durrësit ka vendosur ndaj Dashit fillimisht masën e sigurisë “arrest në shtëpi” dhe më tej, ka pranuar kërkesën e prokurorisë së qytetit bregdetar, duke caktuar “detyrim për paraqitje”.
Prokuroria e Durrësit ka nisur hetimin në vitin 2017, pasi një ish-punonjëse e institucionit kallëzoi penalisht faktin se një kompanie private i është shitur një sasi skrapi më e madhe, sesa ajo e përcaktuar në një ankand, të zhvilluar në fund të vitit 2016.
Prokuroria ka parashtruar para gjykatës se shtetasi Ilir Dashi, me cilësinë e Administratorit te shoqërisë Hekurudha Shqiptare, si dhe përfaqësuesi i kësaj shoqërie ne lidhje me nënshkrimin e kontratës të datës 30.01.2017 ka konsumuar elementet e veprës penale te “Shpërdorimi i detyrës”.
Sipas prokurorisë, Dashi “ka nënshkruar kontratën “Shitje skrapi hekurudhor” me subjekt “Al-Asfalt” sh.p.k, me përfaqësues Ani Keçi, duke u bazuar në procesverbalin e datës 09.07.2014 për 14 lokomotiva, kur ndërkohë referuar procesverbalit të datës 04.04.2016 gjendja faktike e peshës së këtyre lokomotivave ishte ne sasinë e 304 ton me tepër nga kontrata që ai ka firmosur realisht dhe i është bërë pagesa shoqërisë nënshkruese të kontratës”.
Prokuroria e Durrësit ka përllogaritur se veprimet e dyshuara të kundërligjshme të Ilir Dashit, i kanë sjellë buxhetit të shtetit një dëm ekonomik në masën 10.523.103 lekë pa TVSh.
Në bazë të hetimeve paraprake, Prokuroria e Durrësit, në datë 5 Tetor 2020, ka kërkuar fillimisht nga gjykata caktimin e masës së sigurisë “arrest me burg” ndaj Ilir Dashit.
Kjo kërkesë është refuzuar, pasi gjykata konstatoi disa mangësi proceduriale, ndër të tjera edhe faktin që prokuroria nuk e kishte shënuar emrin e Dashit në regjistrin e personave nën hetim.
Pas këtij refuzimi të parë, prokuroria e Durrësit ka këmbëngulur sërish në arrestimin e Ilir Dashit, duke dorëzuar një kërkesë të dytë. Në 19 Tetor 2020, gjykata e qytetit bregdetar vendosi se ndaj ish-drejtuesit të Hekurudhave duhej caktuar masa e sigurimir “arrest në shtëpi”.
Në datë 22 Tetor, prokurorja e çështjes kërkoi nga gjykata marrjen në pyetje të personit nën hetim.
Gjatë asaj seance, prokurorja kërkoi fillimisht vijimin e masës së sigurisë “arrest në shtëpi”. Por, pasi u njoh me gjendjen shëndetësore të Ilir Dashit, kërkoi që hetimi ndaj tij të vijonte me masën “detyrim për paraqitje”.
Kjo kërkesë e prokurores së seancës u pranua nga gjykata. Tashmë, vijimi i hetimit ndaj ish-drejtuesit të lartë të Hekurudhave do të kryhet nën masën e butë të sigurisë.
