Nga Boldnews.al
Pandemia Covid-19 u shoqërua me një rritje të menjëhershme të nevojës për pastrimin dhe dezinfektimin e ambjenteve publike dhe institucionave shtetërore.
Miliarda lekë nga buxheti i shtetit u orientuan në mënyrë të menjëhershme drejt blerjes së sapunëve të lëngshëm, alkolit dhe detergjentëve për të siguruar një pastërti sa më të madhe, me qëllim parandalimin e virusit.
Natyrisht, një rritje urgjente e kërkesës ndihmoi kompanitë e materialeve pastruese për të shtuar fitimet e tyre.
Njëra prej tyre, “Pastrime Silvio”, duket se ka pasur një fat të mirë, duke u shpallur fituese në një pjesë të konsiderueshme të tenderave “emergjentë” dhe pa garë, të zhvilluar nga Bashkia e Tiranës, e drejtuar nga Erion Veliaj.
Duke filluar nga Marsi 2020, kompania “Pastrime Silvio” ka fituar të paktën 5 procedura “të mbyllura”, me vlerë totale rreth 370 milionë lekë (të vjetra), të zhvilluara nga Bashkia e Tiranës.
Për të gjitha këto procedura, portali informativ “spendingada.al” ka ngritur “flamurin e kuq”, për mungesë konkurence.
Në vijimësi, kompania “Pastrime Silvio” ka përfituar në total rreth 650 milionë lekë të vjetra nga qeverisja lokale e kryeqytetit, në pjesën më të madhe në mungesë të konkurencës.
Krahas Bashkisë së Tiranës, janë edhe një seri e gjatë institucionesh që kanë kontribuuar në rritjen e financave për kompaninë e pastrimit.
Sipas të dhënave të “opendata.al”, vetëm në periudhën 2019-2020, autoritetet publike kanë kryer transaksione financiare drejt “Pastrime Silvio” një shifër në total rreth 2.3 miliardë lekë të vjetra.
Dy vitet e fundit, 2019-2020, duket se kanë qenë frytdhënëse për kompaninë private, të krijuar në vitin 2009.
Në tre vitet e mëparshme, ka arkëtuar thuajse gjysmën e fondeve publike që ka siguruar nga kontratat e dy viteve të fundit.
Në periudhën 2015-2018, “Pastrime Silvio” ka arkëtuar rreth 1.45 miliard lekë të vjetra.
