Ndërtimi i banesave të reja në Laç nga autoritetet turke u prit mirë në Shqipëri, veçanërisht në qytetin ku do të ngrihen objektet. Por në Turqi tenderi për rindërtimin në Shqipëri i ka hapur probleme presidentit Erdogan. Në mediat turke kanë dalë detaje se si e ka fituar tenderin kompania Albayrak, që kryen aktualisht punimet në Laç.
Sipas shtypit vendas, tenderin prej 321 milionë lira turke e ka fituar firma që drejtohet nga Nuri Albayrak, një nga njerëzit e afërt me Presidentin turk dhe i lidhur ngushtë me partinë në pushtet AKP. Në media shkruhet se kompania është shpallur fituese në një proces pa garë dhe ku nuk ka patur tjetër firmë që të shpaloste projektin e saj. Për ndërtesat e reja në Laç qeveria turke nuk ka njoftuar për tender të hapur, por agjencia shtetërore TOKI ka shpallur fituese direkt kompaninë e Nuri Albajrak që është gjithashtu edhe pronar i gazetës proqeveritare Yeni Safak.
Albayrak e mori tenderin në datën 20 Korrik të këtij viti, pak ditë pasi agjencia shtetërore TOKI dhe Ministri i Infrastrukturës Murat Kurum arritën marrëveshjen me autoritetet shqiptare. Projekti i TOKI-t parashikon ndërtimin e 522 njësive të banimit në Laç ku 37 prej tyre janë njësi tregtare dhe 375 janë vendbanime. Kompania Albayrak e nisi punën e ngritjes së objekteve në qytetin e Laçit në fillim të Shtator dhe banesat pritet të mbarojnë brenda një viti.
