Skandali me BKH-në/ Oficerët padisin Komisionin e Vlerësimit, akuza për falsifikim dhe shpërdorim detyre

Shtatë oficerë, të skualifikuar në garën për në Byronë Kombëtare të Hetimit, kanë kallëzuar penalisht Komisionin e Vlerësimit që përzgjedh hetuesit e byrosë.

Dritan Prençi, Enkelejda Millonai, Vladimir Mara, kryeprokurori i SPAK, Arben Kraja si dhe drejtuesen e BKH, Aida Hajnaj janë kallëzuar për shpërdorim detyre dhe falsifikim dokumentesh.

Padia e kandidatëve për oficerë të BKH është depozituar në Prokurorinë e Tiranës.

Ndërkohë, një ditë më parë kanë qenë kandidatët e skualifikuar në testin fizik ata që i janë drejtuar Gjykatës Administrative për të ankimuar rezultatet e raundit të dytë të vlerësimit.

Në paditë e përpiluara prej tyre kandidatët shprehen se në testin fizik nuk ka pasur përcaktim të kritereve dhe pikëve siç ishin përcaktuar në fazën e parë, atë të testit logjik.

LEXO EDHE  VIDEO/ Udhëtoi me helikopter drejt Dibrës për fushatë, Vokshi i nxjerr gënjeshtrën Xhaçkës

Gara për oficerë në Byronë Kombëtare të Hetimit është tashmë në fazën e fundit, atë të esesë. Pak ditë më parë aplikantët iu nënshtruan testit fizik, ku vetëm 103 prej tyre kaluan me sukses këtë fazë.

Kandidatët e skualifikuar pretendojnë se në këtë fazë të garës nuk pati transparencë dhe as kritere të përcaktuara lidhur me pragun e pikëve në disiplinat e testit fizik.

Për këtë nuk kanë munguar komentet negative ne drejtim të ambasadës amerikane që mbështet krijimin e BKH-së, ndërsa mësohet se disa prej kandidatëve që kanë pretendime, do t’i drejtohen instancave me një kallëzim penal për manipulim të rezultateve.