Ministria e Shëndetësisë reagon pasi një 53-vjeçar nga Ndroqi humbi jetën në dyert e spitaleve, ndërsa askush prej tyre nuk mori përsipër të kuronte.
Pas denoncimit të Partisë Demokratike, Ministria thotë se ka ngritur një grup pune për të hetuar çfarë ndodhi me të ndjerin Lutfi Çekiri.
“Ministria e Shëndetësisë siguron se do të kryhet hetimi i plotë administrativ për procedurat e ndjekura nga strukturat spitalore.
Ministria e Shëndetësisë dhe Mbrojtjes Sociale siguron qytetarët se shërbimi mjekësor është në gatishmëri për të ofruar jo vetëm urgjencat 24/7, por të gjitha shërbimet e nevojshme për qytetarët në të gjitha nivelet e kujdesit mjekësor”, deklaron MSH.
Në fakt Ministria e Shëndetësisë nuk ka për detyrë që të hetojë as të shprehë ngushëllime kur ka humbje jetësh njerëzore, por të garantojë që qytetarët të marrin trajtim shëndetësor, të garantojë kushtet që qytetarët të marrin ndihmën e parë mjekësore dhe trajtimin e duhur.
Një ditë para se të vdiste, 53-vjeçari së bashku me bashkëshorten kishin kaluar ditën e natën pranë ambienteve të spitaleve, të dëshpëruar se dikush mund ti shihte dhe do ti jepte një përgjigjje për gjendjen e rënduar shëndetësore, por jo.
Çekiri u intervistua nga Fax News duke treguar se si e kaluan nga një spital tek tjetri, pa u shqetësuar aspak se sa po përkeqësohej gjendja e tij.
“Mbrëmë ishim në urgjencë dhe na kanë sjellë këtu për stomakun. Këtij i thotë shko tek infektivi, tjetri thotë s’je për këtu. Kemi qenë mbrëmë në Urgjencë, nga këtu shkuam në Laprakë. Atje më dhanë qetësues e më thanë duhet të shkosh të vizitohesh për stomakun. Tani nuk na japin përgjigje, një thotë shko atje. Jam me veshka, me ulçerë në stomak, tensionin e kam të ulët”, tha Çekiri ndërsa gruaja shtoi se ka nevojë urgjente për shtrim.
