Komisioni i vlerësimit të Kandidatëve pranë PD-së, përmes një deklarate, bën të ditur se përmbylli dje procesin për përzgjedhjen e kandidatëve për zgjedhjet e ardhshme parlamentare dhe vendore.
Sipas Komisionit, ky proces, i zhvilluar për herë të parë në Shqipëri, është vlerësuar pozitivisht nga anëtarësia e PD-së, opinioni publik dhe mediat. Komisioni e vlerëson procesin në tërësi si një akt emancipues në politikën shqiptare.
“Komisioni e ndau punën në 3 faza: nga 03 gusht 2020 deri ne 22 tetor 2020. Pas një pune intensive dhe voluminoze komisioni përfundoi vlerësimin për 3593 kandidatë të propozuar, në një listë përfundimtare prej 326 kandidatësh të propozuar për përfaqësim politik në zgjedhjet e ardhshme politike apo lokale.
Komisioni, i dorëzoi sot Kryetarit dhe Sekretarit të Përgjithshëm të PDSH, listën përfundimtare të kandidatëve për ndjekjen e procedurave të mëtejshme sipas Statutit.
Përfitojmë nga rasti për të falenderuar anëtarësinë për pjesëmarrjen masive në votime, strukturën e PD-së, përfaqësuar në këtë proces përzgjedhjeje nga Sekretariati teknik, si dhe kandidatët e propozuar që ndihmuan realizmin e këtij procesi transparent, qytetar dhe të përgjegjshëm”, thuhet në deklaratën zyrtare.
Ndërkohë që Komisioni nuk ka bërë publike listën zyrtare të kandidatëve, ndërsa një ditë më parë u raportua se rreth 120 emra që kishin kaluar filtrin e votimeve nga anëtarësia janë skualifikuar nga ky komision. Në media kanë qarkulluar emra të kandidatëve që janë skualifikuar, por zyrtarisht gjithçka mbahet hermetike.
