Kryeministri Edi Rama pasditen e sotme ishte për vizitë në fshatin Farkë të Tiranës, ku i dorëzoi letrën e legalizimit familjes Qordja, të cilët hynë në katër shtëpitë e reja të rikonstruktuara pas dëmtimit që patën nga tërmeti i 26 Nëntorit.
Gjatë takimit dhe bisedës së zhvilluar aty mes të tjerash Rama ka ironizuar deklaratën e kryetares së LSI, Monika Kryemadhi, e cila nga Vora, i kërkoi qytetarëve mos të lëshojnë shtëpitë ku janë strehuar pas tëmetit të 26 Nëntorit.
Rama iu përgjigj duke thënë me ironi se qytetarët janë mjaftueshëm të zgjuar dhe nuk do e hanë karremin e Monikës për të rënë në tiganin e saj.
Rama: Shyqyr që nuk keni pasur konflikte sherre. E mbajmë llafin ne socialistët që thoni se gënjejmë. Ti e paske shtëpinë më të madhe apo je demokrati më i madh
Banori: Jo nuk jam demokrati më i madh jemi içik më shumë ne
Rama: Disa i kanë pasur dokumentet, disa jo se kështu i lanë këta të PD-së, çorap.
Veliaj: Kishin vajtur disa politikanë në Vorë i thonin mos dilni nga shtëpia. I thoshte rri rreziko jetën dhe vidh lekët e shtetit
Rama: Kush ishte, këta?
Veliaj: Jo nuk ishte PD ishte një parti tjetër, Monika me këta
Rama: Në këtë pikë i dashur ne socialistët dhe ju demokratët kemi të njëjtin hall me këta të tiganit. Këtu na bashkon halli. O ju, o ne na qepen me tigan në dorë dhe thonë duam peshk. Ky është halli i përbashkët që do ta zgjidhim besoj. Ky është helmi i përditshëm, zhurma, çorodia, nëpër kanale, nëpër portale, por njerëzit nuk janë budallenj. Fatkeqësia e këtyre më e madhe është se i dinë njerëzit budallenj, por nuk i hanë këto lloj karremash për të përfunduar në tiganin e Monikës. Po nejse mos ta prishim tani. Po mirë ishte sa po mos me na marrë sysh kjo pjesë.
