Komisioni i Vlerësimit të Kandidatëve për deputetë për zgjedhjet e 25 prillit ka mbyllur procesin e verifikimit, ndërsa i ka përcjellë kryesisë së PD, listën me 316 emra.
Pas më shumë se dy javësh nga momenti kur anëtarësia e PD-së u shpreh me votë lidhur me kandidatët e propozuar, që më parë kishin kaluar në filtrin e Komisionit, sot ky i fundit ka reduktuar listën me 182 emra.
Anëtarësia e PD-së vlerësoi kandidatët me votë kontestuese, ndërsa nga gara u përjashtuan disa emra jo pak të njohur, si në Qarkun e Kukësit, Beratit apo Korçës. Në përfundim të procesit, anëtarësia vendosi për vijim e garës për 498 emra të propozuar, ndërsa nga ky proces u përjashtuan Astrit Veliaj, Hekuran Hoxholli, Klevis Balliu, të tre ish-deputetë. Në Kukës u skualifikuan dy ish-Kryebashkiakë, ndërsa emrat e tjerë të penalizuar me votë kontestuese ishin më pak të njohur.
Faza e parë ishte propozimi nga baza e PD-së, më pas lista u kthye sërish te anëtarësia pas seleksionimeve për të skualifikuar rreth 65 % të emrave të propozuar dhe faza e tretë ishte filtri i fundit nga Komisioni.
Kjo ishte faza e fundit e komisonit, tani është kryesia dhe Këshilli Kombëtar i PD-së, që pritet që të vendosin për emrat që do të jenë në lista.
