Ish-kryeministri Sali Berisha, i ftuar në emisionin “Çim Peka LIVE”, komentoi atë që e opozita e quan “afera e inceneratorëve”.
Ai tha se nuk ka asnjë besim se SPAK do e hetojë këtë aferë. Sipas tij, SPAK ka nisur të hetojë individë të dorës së katërt.
“Te SPAK si një institucion që u ngrit në kundërshtim me Kushtetutën, dhe u përzgjodh në mënyrë antikushtetuese nga kunat-KLP-ja, unë nuk mund të kem asnjë besim. Unë kam të dhëna sipas të cilëve SPAK është ngritur me kushtin e vetëm që të mos mendojë ndonëherë për të hetuar eksponentë të qeverisë apo PS-së, gjë të cilën e ka faktuar në mënyrë perfekte deri më tani,” tha Berisha.
“Shqiptarëve u paguajnë këtyre mamuthëve të korrupsionit, me në krye Edi Ramën, Arben Ahmetajn, Erion Veliajn, Ter Kokën e Arben Malavitën për një ton pleh nga mundi, taksat dhe djersa e tyre, gjashtë herë më shumë sesa taksapaguesit gjermanë. Këtu hyn edhe falsifikimi i faturave, pasi shqiptarët konsumojnë dy herë më pak se gjermanët dhe italianët. Por sipas aferave, shqiptarët prodhojnë tre-katër herë më shumë plehra se kombet e tjera. Fatura fryhet nga mafia e tmerrshme kanceroze e plehrave,” shtoi ish-kryeministri .
Berisha e quajti skandaloze deklaratën e djeshme të kryeministrit Edi Rama se nuk i interesojnë procedurat për inceneratorët.
“Djegësi i Elbasanit, i Fierit dhe i Tiranës, nga i cili funksionon vetëm i Elbasanit, janë monopol i një grushti qeveritarësh, që kanë një sekser që quhet Mirel Mërtiri dhe bashkëpunëtorin e tij, Klodian Zoto. Të gjitha këto janë dhënë në shkelje flagrante të procedurave që nuk i interesojnë zotit Rama. Nëse djegësat nuk janë të teknologjisë së avancuar, helmojnë mjedisin dhe qytetarët. Problemi është se djegësi mori flakë përpara se të ndërtohet. Ka 14 vendime qeveritare të firmosura brenda një dite. Në 30 vite, por në asnjë vend tjetër, nuk ndodh kurrë një procedurë që të marrë 14 firma ministeriore dhe qeveritare brenda një dite,” tha Berisha.
Sipas ish-kryeministrit, nuk është e vërtetë që përpara se Rama të vinte në pushtet, nuk trajtoheshin mbetjet.
“Shqipëria sot është më e mbushur më shumë se kurrë në plehra. Landfilli i Sharrës ka të paktën 20 vite që ekziston aty, e ka lejen që në vitin 2002. Landfilli i Bushatit dhe i Maliqit në Korçë janë të vitit 2007. Kishte projekt dhe toka gati për landfill në Sarandë. Kishte edhe të tjera projekte. BE ka përcaktuar landfillin si prioritet kryesor,” tha Berisha.
