Biznesmeni Andon Dhima ka reaguar pas arrestimit të katër personave që dyshohet se janë të përfshirë në atentatin e dështuar ndaj tij, në hyrje në pallatit, ngjarje e ndodhur në 15 tetor.
Ndërsa përshëndet policinë për operacionin e kryer, Dhima kërkon që organet e drejtësisë të mos shantazhohen nga asnjë presioni për zbardhjen e plotë të ngjarjes.
Biznesmeni shkruan se i qëndron deklarimeve të mëparshme në lidhje me ngjarjen duke kërkuar nga policia dhe prokuroria vijimin e hetimeve.
Dhima ka hedhur akuza direkte ndaj Ben Blushit, duke pohuar për policinë konfliktet që ka me të.
Policia ka ndaluar 4 persona, të cilët dyshohen për atentatin e dështuar ndaj biznesmenit Andon Dhima në Tiranë. Të arrestuarit, mësohet se janë Gridi Lena, Albin Hoxha, Mariglen Metohiti dhe Enea Hoxha.
Sipas policisë, Gridi Lena dhe Albin Hoxha, përkatësisht 45 dhe 35 vjeç, kanë tentuar të vrasin biznesmenin Dhima. Ndërkohë që dy personat e tjerë kanë bashkëpunuar me autorët e dyshuar të atentatit të dështuar.
Mësohet se dy të dyshuar u ndaluan në zonë e “Brrylit”, ndërsa dy të tjerë pranë “Mozaikut të Tiranës”.
Të ndaluarve iu gjetën nga policia armë dhe maska. Sakaq dy nga të ndaluarit janë persona që tentuan vrasjen e biznesmenit, ndërsa dy të tjerë mësohet se kishin rol ndihmës.
Mendohet se katër personat e ndalur kanë qenë të përfshirë në ngjarje të tjera kriminale.
