Lulzim Basha, kryetar i PD-së, u pyet sot nga gazetarët nëse do t’i kërkonte Presidentit Ilir Meta shpërndarjen e Parlamentit. Në përgjigjen e tij, Basha tha se mirëpret çdo nismë që shkurton ditët e së keqes dhe sa më shpejt kjo të ndodhë aq më mirë është për qytetarët e vendit.
“Shqetësimi im kryesor do të jetë ai i shqiptarëve dhe në veprim të kësaj s’do të kursejë asnjë thirrje të nevojshme. Po të ishin mbajtur zgjedhjet rruga e keqe do ishte shkurutar. Sa më shpejt aq më mirë si për të gjithë. Detyrat janë të përcaktuara dhe unë si kryetar i opozitës do ta bëj deri në fund. E mirëpres dhe përshëndes çdo hap që ia shkurton ditët së keqes”, tha Basha
Teza për shpërndarjen e Parlamentit u artikulua para pak ditësh nga një eksponent i rëndësishëm i Opozitës së Bashkuar.
Kreu i Partisë Republikane, Fatmir Mediu në një takim me strukturat e partisë së tij në Shkodër deklaroi se presidenti Ilir Meta duhet të shpërndajë Parlamentin, nëse “parlamenti nuk merr në konsideratë dekretin e tij për kthimin e ndryshimeve të njëanshme të kodit elektoral të bëra nga Rama duke shkatërruar konsensusin e 5 qershorit dhe standardet për zgjedhje të lira dhe të ndershme”.
“Presidenti i Republikës duhet të shpërndajë parlamentin nëse parlamenti nuk merr në konsideratë dekretin e tij për kthimin e ndryshimeve të njëanshme të kodit elektoral të bëra nga Rama duke shkatërruar konsensusin e 5 qershorit dhe standardet për zgjedhje të lira dhe të ndershme
Presidenti ka bërë në mënyrë publike dhe të përsëritur qëndrimin se do shpërndajë parlamentin nëse do të cenohet kushtetuta dhe standardet e zgjedhjeve, në respekt të detyrimit të tij.
I kam kërkuar opozitës dhe e përsëris qe opozita dhe veçanërisht PD duhet t’ja kërkojë Metës të marrë një vendim të tillë”, deklaroi Mediu.
