Partia Demokratike ka depozituar në SPAK kallzimin penal ndaj Kryeministrit Edi Rama, ministrit Arben Ahmetaj, Kryebashkiakut Erion Veliaj, deputetit Lefter Koka, ish-ministër i Mjedisit, biznesmenëve Klodian Zoto dhe Mirel Mërtiri.
Në kallzimin e firmosur nga Sekretari i Përgjithshëm i PD, Gazmend Bardhi, ata akuzohen për shpërdorim detyre, shkelje e barazizë së pjesëmarrësve në tenderat publikë, si dhe krijim i grupit të strukturuar kriminal.
Kallzimi në SPAK ka lidhje me 3 inceneratorët në Tiranë, Fier dhe Elbasan, për të cilat opozita prej disa javësh akuzon Kryeministrin Edi Rama se i ka dhënë 75 mln euro, ndërkohë që inceneratorët nuk janë në punë. Gjithashtu janë denoncuar kontratat dhe pagesat e kryera dhe ato që do të kryhen në periudhën në vijim.
Duke sqaruar kallëzimin penal të PD-së, Sekretari për Çështjet Ligjore, Çlirim Gjata, tha se prej tri vitesh bëhen denoncime.
“Prokuroria duhet të reagojë. Pse duhet të presë patjetër një denoncim formal. Denoncimet janë dytësore sa i takon procedurës. Prokuroria duhet të veprojë vetë. Ka tre vite që heshtin”, u shpreh Gjata.
Ndërkohë ish-deputetja, Jorida Tabaku, tha se kjo është një çështje korruptive. “Kostot për buxhetin e shtetit janë mbi 430 milion euro vetëm për inceneratorin e Tiranës. Ne sot denoncuam vetëm inceneratorin e Tiranës”, sqaroi ajo.
https://www.youtube.com/watch?v=66BTbSnBPWY&feature=youtu.be
