Kryeministri Edi Rama ka reaguar përmes rrjeteve sociale lidhur me grevën e naftëtarëve në Ballsh.
Në rrjetin social “Twitter” Rama i bën thirrje që ta ndërpresin grevën, ndërsa i fton që të ulen të bisedojnë.
“U përsëris naftëtarëve të Ballshit që greva e tyre është e panevojshme, sepse unë jam me ta dhe qeveria është e tyrja!
Ne jemi plotësisht të ndjeshëm ndaj hallit të tyre që është edhe halli ynë dhe është absurde që hallin t’ua qajnë ata që ua shkaktuan!
I ftoj vëllazërisht ta ndërpresin grevën dhe jam i gatshëm të ulem e të bisedoj me ta për këtë hall të përbashkët, por jo kështu!Kështu jo, sepse presionet e ultimatumet nuk funksionojnë në asnjë familje dhe punëtorët e Ballshit nuk bëjnë përjashtim nga ky parim i panegociueshëm”, shkruan Rama.
Të ndodhur në ditën e pestë të grevës së urisë, naftëtaret ende nuk kanë marrë asnjë zgjidhje, lidhur me kërkesat e tyre.
Ndërkohë ditën e sotme shëndeti i tyre është përkeqësuar.
Duke i bërë apel deputeteve gra në Parlament, ambasadores së SHBA-së në Tiranë Yuri Kim, si edhe ministres për Marrëdhëniet me Parlamentin Elisa Spiropali, ata kërkojnë që kjo situatë të marrë një zgjidhje.
“U bëj thirrje të gjitha grave, zonjave në parlament. Ambasadores Yuri Kim, ambasadores suedeze, zonjës Spiropali. Po jetojmë në një muaj të dhimbshëm ku nënat po heqin pjesë nga shpirti i tyre për të ushqyer ata fëmijë që kemi lënë. Jam shumë e shqetësuar për shoqen që kam shumë rëndë. Doli në pension dhe nuk e gëzoi. Bëj thirrje që të dalim nga kjo skëterrë”, u shpreh një prej grave tashmë prej ditësh në grevë.
