Maskaradë e ka cilësuar, Presidenti Ilir Meta, Aktin Normativ më të fundit të Qeverisë, sipas të cilit qytetarët gjobiten nëse nuk mbajnë maskat në ambientet publike.
Meta tha se mbështet çdo vendim të bazuar nga ekspertët që parandalon përhapjen e Covid-19, por thekson se gjobitja e tyre për mosmbajtjen e maskës, është shkelje e të drejtave të njeriut.
“Masat anti-Covid duhet t’i respektojmë të gjithë, por të kërcënosh qytetarët me gjoba, t’i shantazhosh ato, ti vendosësh gjoba në faturat e energjisë elektrike, është maskarallëk. Çfarë do të bëjë OSHEE do t’i ndërpresë energjinë qytetarëve? A e ka të drejtën OSHEE të mbledhë gjobat dhe nëse ato nuk paguhen çfarë do të bëjë do i ndërpresë energjinë?
Ndaj i bëj thirrje Kuvendit dhe Qeverisë që të reflektojnë, Masat anti-Covid duhet të respektohen, por Qeveria s’mund të mbulojë përgjegjësitë e saj duke kërcënuar qytetarët”, tha Meta.
“Çdo masë që merret për arsye shëndetësore e certifikuar nga ekspertë e mirëpritur, por përmbajtja e aktit që gjobit qytetarët për mosmbajtjen e maskave është një maskaradë, se shkel në mënyrë flagrante të drejtat e qytetarëvre, se mund ti lërë pa drita në fund të muajit në mes te dimrit se i shantazhon me burg, e shndërron OSHEE në një instrument policor e ndoshta edhe elektoral që ekzekuton në mënyrë të paligjshme gjoba. Nuk është zgjidhje ti lësh njerëzit pa drita, e që në fund të muajit kur mos të kenë mundësinë të paguajnë gjobat ti presësh dritat e ti shantazhosh me burg.
OSHEE ka mision të furnizojë më energji elektrike, s’mund të ndërpresë energjinë për mosmbajtjen e maskës, akti normativ në 3 fjali tërësisht të paqarta e të mjegullta shkon shumë më tej në qëllimet e tij dashakeqëse.
Do ti bëjë me precedent penal shqiptarët të përfundojnë në dyert e prokurorisë e gjykatës e të harrojnë problemet themelore ku qeveria ka zhytur vendin. I bëj thirrje qeverisë ta rishikojë e Kuvendi ta ndryshojë atë”, tha Meta.
