Ministri i Brendshëm, Sandër Lleshaj, duke iu përgjigjur në interpelancë deputetit Lefter Maliqi, lidhur me çështjet e sigurisë.
Ministri i Brendshëm paraqiti një tjetër panoramë lidhur me çështjet e krimit, sigurisë apo kanabizimit të vendit, madje në shumë aspekte sipas tij, Shqipëria është shumë më mirë se disa vende të BE-së.
Lleshaj tha se Shqipëria ka situatën më të mirë të rendit dhe sigurisë, duke shtuar se Shqipëria ka 1.7 vrasje për 100 mijë banorë.
“Është fakt se treguesit negativë të sigurisë në vend janë në rënie të panjohura më parë, ndërsa është rritur zbulueshmëria e krimeve dhe ngjarjeve kriminale. 75 % e shqiptarëve ndihen të sigurtë, dhe kemi arritur në këtë situatë, pasi krimi po luftohet fortë.
1700 policë janë shtuar në dy mandatet e Kryeministrit Edi Rama, ndëkohë që 700 janë shtuar vetëm vitin e fundit. janë sekuestruar 219 pasuri me vendim gjykate, ndërsa mbi 1 mijë të tjera presin vendimin e Gjykatës së Posaçme”, tha Lleshaj.
Sipas tij, Shqipëria nuk ka ndonjë njollë të rrezikshme ku nuk lejohet kalimi, ndërkohë që edhe në Europë gjenden njolla të tilla.
Lleshaj tha se në Shqipëri kronika e zezë në shumë media zë vendin kryesor, edhe pse në vende të BE-së, niveli i kriminalitetit është 2 apo 5 herë më i lartë se në Shqipëri.
“Ka përpjekje për krijimin e një psikoze artificiale të kriminalitetit. Policia të mos shndërrohet në tabelë qitjeje”, tha Lleshaj.
Lidhur me situatën e kanabizimit, Lleshaj tha se 2020 shënoi një sukses, ndërsa kanabisi ka marrë goditje shkatërrimtare.
“Në brigjet italiane janë kapur gjatë 2020 vetëm 900 kg kanabis, ndërkohë që vite më parë janë kapur deri në 60 ton. Çmimi i kanabisit ka pësuar një rritje stratosferike dhe kjo tregon se ka tentativa sporadike të kultivimit të tij, në parcela të izoluara. Madje mund t’ju them se janë lodhur për të shkrepur ndonjë foto nga parcela me kanabis”, tha Lleshaj.
