Deputeti Lefter Maliqi tha gjatë fjalës në Kuvend se policia po tregohet e paaftë për të parandaluar krimin. Maliqi i konsideroi shifrat e paraqitura nga Lleshaj si një plan pune, duke shtuar se ato janë përralla me të cilat nuk mund të gënjehen shqiptarët.
“Nuk je as socialist dhe as rilindas dhe të uroj mos kesh as fatin e Tahirit që po bredh gjykatave apo ministrave të tjerë të Brendshëm që nuk janë sot as në sallën e Kuvendit.
Rilindja i përdor njerëzit dhe i hedh në rrugë. Ndërkohë që policët nuk marrin dietat, ju keni një makinë luksoze. Ske bërë transparencë për makinën që keni. Krimi po shpërthen në mes të qytetit, ndërsa ju çuar me mijëra policë për të shembur Teatrin, për të sulmuar median.
Krimi është bërë njësh me politikën. Njerëzit e ndershëm po i largoni nga policia përmes Vetting. Vajtët bëtë show në Elbasan, ndërkohë që Kryeprokurori thotë se mafia ka në dorë qytetin.
Po bëni tendera korruptivë me qëllim që të fitohen nga baxhanaku i kryemafiozit të Rilindjes.
Policinë po e përdorni për të vënë gjoba, ndërsa të fortët fitojnë tenderat dhe kërcënojnë policët, që me byrekë në duar, i çoni të kontrollojnë parcelat me kanabis dhe ju pastaj çfarë bëni? Arrestoni disa kryepleq, por jo ata që kanë parcelat”, tha Maliqi.
Duke iu drejtuar Lleshajt, Maliqi tha se uronte që mos kishte fatin e Tahirit, i cili pasi u përdor nga Edi Rama, u flak në rrugë.
“Ministri i Brendshëm është keqpërdorur nga Kryeministri. Jeni i vetmi ministër që keni përdorur gaz lotsjellës me urdhra verbalë”, tha Maliqi.
