‘Politikat e Edi Ramës për bujqësinë janë politika shpopullimi’, kështu u shpreh kryetarja e LSI, Monika Kryemadhi në një intervistë për Fax News.
Sipas Kryemadhit, Rama shkatërroi bujqësinë për interes të oligarkëve duke sjellë dhe shpopullimin e vendit.
‘Ai jo pa qëllim e shkatërroi bujqësinë. Sepse duke shkatërruar bujqësinë, kërkon shpopullimin e Shqipërisë. 51% e popullsisë shqiptare jeton me bujqësinë. Çfarë bëri? Shkatërroi bujqësinë, shkatërroi blegtorinë, në mënyrë të tillë që të detyrojë shqiptarët që të largohen të punojnë në shtetet e tjera për sa i përket bujqësisë dhe blegtorisë, sepse në Shqipëri e ka të pamundur. Një kuintal misër po ta prodhosh në Shqipëri del me koston e dyfishit të një kuintali misër që mund të importohet nga jashtë.
Një qengj, që dikur bënte 80 mijë lekë, i therur, sot e blejmë nga jashtë sepse po ta mbajmë në Shqipëri do të kushtonte 160 mijë lekë. Pra, humbja e 500 mijë krerëve që ishin në treg gjithmonë në Shqipëri të dhenve, sot është mbyllur. Pra do të thotë që tufa të tëra janë shitur dhe nuk ekzistojnë më, sepse importohet mishi i huaj për interes të disa personave.
Pra automatikisht historia dhe politikat e tij ndaj bujqësisë janë politika shpopullimi, jo vetëm politika dëmtimi të bujqësisë dhe të ekonomisë.’-tha Kryemadhi.
