Monika Kryemadhi, kryetare e LSI, shprehet se gjyqet e humbura në arbitrazh nga Qeveria janë të qëllimshme, ndërsa akuzoi se paratë ndahen me familjarët e Edi Ramës.
Duke folur mbi disa nga proceset gjyqësore të humbura në arbitrazh nga Shqipëria në Fax News, Monika Kryemadhi, u shpreh se humbja e atyre është bërë me qëllim.
Sipas saj, gjyqet që ka humbur Qeveria, janë humbur në bashkëpunim me Edi Ramën dhe janë fatura të cilat jam e bindur se kompanitë që kanë fituar gjyqet nuk kanë për të marrë as 1/10-n e tyre dhe 90 për qind e parave të cilat bëhet sikur do të merren nga kompanitë e arbitrazhit do të ishin para që do të ndaheshin midis Edi Ramës dhe familjarëve të tij.
“Mjafton të shkosh në zyrat e arbitrazhit ndërkombëtar dhe të shikosh se si është bërë kjo procedurë dhe familjarët e tij të përfshirë në këto kompani. Kështu që do të tërhiqen të gjitha kompanitë që kanë hyrë në këtë allishverish me Edi Ramën.
Shqipërinë Rama gati e ka shitur, e ka bërë PPP, e ka bërë inceneratorë, kudo që të shkosh gjithçka është e shitur apo e privatizuar.
Do shkojë haku te i zoti, sepse çdo gjë që ai ka bërë e ka bërë në mënyrë të paligjshme, e ka bërë në mënyrë të kundërligjshme dhe për herë të parë do të ketë njerëz që do ta paguajnë me lirinë e tyre”, tha kryetarja e LSI.
