Duke nisur nga dita e enjte, datë 15 tetor, mbajta e maskës do jetë e detyrueshme në të gjitha ambientet, përfshi këtu edhe parqe.
Kryeministri Edi Rama njoftoi pak ditë më parë se mos mbajtja e maskës do ndëshkohet me gjobë, ndërsa rrugët do të patrullohen nga policë bashkiakë dhe ato të rendit.
E ndërsa në kohën e karantinës së detyrueshme mars-maj, Rama nxorri në rrugë ushtrinë dhe mjetet e saj që patrullonin rrugët, sot ka zgjedhur të përdorë policët, qofshin ato të rendit apo bashkiakë.
Shkelësit e aktit normativ do të gjobiten me 3 mijë lekë të rinj, por në rast konstatimi të përsëritjes së shkeljes, gjoba merr formë progresive, duke shkuar në 6, 9, 12 mijë lekë e kështu me radhë.
Gjoba do të paguhet përmes faturës së energjisë elektrike dhe do të jetë e shkruar me emrin e personit që ka kryer shkeljen duke shkruar gjeneralitetet dhe numrin e kartës së identitetit.
Në rast se shkelësi nuk ka me vete mjet identifikimi dhe është mbi 18 vjeç, ai do të shoqërohet në komisariat. Për minorenët policia do të veprojë me këshillime.
Pikat e detajuara të aktit të ri normative, për mbajtjen e detyrueshme të maskës në çdo ambient do bëhen publike ditën e mërkurë.
