Kryedemokrati Lulzim Basha iu kundërpërgjigj në të njëjtën formë ironisë së kryeministrisë Edi Rama në Asamblenë e Partisë Socialiste, për procesin e zgjedhjes së kandidatëve për deputet në PD.
Basha tha nga njësia nr.8 në Tiranë se, s’mund të presë përgëzime nga një person i cili nuk organizon zgjedhje brenda partisë së tij dhe refuzon t’u bindet rregullave të garës.
Basha gjithashtu tha se Rama e zgjati tre orë fjalimin në Asamblenë e PS-së, vetëm për të justifikuar mbajtjen në Kryesi të ish-kryebashkiakut të Durrësit, Vangjush Dako, i cili është shpallur “armik” i Shteteve të Bashkuara dhe është futur në “listën e zezë” të DASH.
“Mos prisni ju që ai të lavdërojë një proces demokratik. Për 22 vite karriera e tij është ngritur mbi parime antidemokratike, për 22 vite refuzon t’u bindet rregullave të garës. Nuk organizon gara në PS, i ka harruar zgjedhjet. Dje u zhvillua një aktivitet dhe mbajti një fjalim tre orësh vetëm për të justifikuar mbajtjen në Kryesi të njerëzve që janë në listën e zezë të DASH, si Vangjush Dako.
Mos më kërkoni mua të krahasoj të pakrahasueshmen. Kjo është një ditë me diell jo thjesht për qytetarët dhe klimën e kësaj të shtune, por një ditë me diell për atë që po vjen, një parathënie për atë që do të vijë pas 25 prillit”, – u shpreh Lulzim Basha.
