Prej 11 ditësh një grup nanfëtarësh të rafinerisë së naftës në Ballash janë në grevë urie. Problemet e tyre kanë nisur më tepër se një vit më parë. Por kur panë se nuk po gjenin zgjidhje dhe nuk morën asnjë përgjigje nga autoritetet, ata përshkallëzuan protestën, duke u ngujuar në grevë urie.
Por ironia e fatit qëndron në faktin se, ndonëse kërkesat e tyre janë të qarta dhe të njohura shumë mirë nga qeveria, kjo e fundit, pra kryeministri Edi Rama nuk e ka marrë mundimin të pyes për këtë kategori.
I vetmi që ka trokitur në derën e dhomës ku qëndrojnë prej 11 ditësh naftëtarët është kryedemokrati Lulzim Basha. Ndonëse nuk ka asgjë në dorë për të përmirësuar situatën financiare të naftëtarëve, Basha u premtoi atyre se me ardhjen në pushtet gjithçka do të rregullohet.
Ndërkohë shefi i qëverisë në daljen e tij të përjavshme të martën para medias, teksa u pyet se çfarë do të ndodh me naftëtarët dhe pse nuk u është dhënë asnjë përgjigje për rrogat e prapambetura dhe rikthimin në punë, tha se ishte investuar personalisht për këtë çështje, madje fluturoi deri në Azerbajxhan për të takuar kryeministrin.
Me vete për në Baku, Rama kishte edhe ministren Belinda Balluku. E ndonëse shkuan për të bindur azerët të shlyejnë detyrimet, duket se prania e Ballukut nuk ka shërbyer për gjë. Pozicioni i saj në takim me azerët nuk ka marrë asnjë shpjegim.
Kompania e cila ka rreth 8 milion euro detyrime, nuk ka kthyer asnjë përgjigje. E, Edi Rama e kaloi këtë çështje duke u shfajësuar se nuk është në dorën e tij situata dhe tashmë duhet të presin frytet e takimit në Azerbajxhan.
